WILLEMSTAD.- Orkan Irma a baha un poko i awor ta 165 mia pa ora ku ta igual ku 265 kilometer pa ora kedando den kategoria 5 i ketu bai un orkan peligroso. E tabata bayendo te ku ayera nochi liña rekta riba Florida despues di a pasa lastra islanan di Karibe.

Ta spera orkan Irma den kareda di djasabra na Florida i ta spera tambe ku pa e dia ei e lo a baha un poko di intensidat. I mientrastantu islanan di Karibe, di kual hopi di nan manera hermana isla St. Maarten a keda destruí pa mas di mitar ya a kuminsá premirá orkan Jose.

Orkan Jose ya a bira kategoria 3 i segun e predikshonnan di servisionan meteorológiko di Merka entre nan di sentro di orkan, e ta bai pasa riba e mesun islanan den Karibe ku Irma tambe a kaba di laga un desaster atras.

Te ku ayera nochi 11’or e tabatin bientunan di 193 kilometer pa ora, hasié fuerte pa un orkan kategoria 3 i e tabata na 635 mia di St. Maarten. No muchu informashon a sali ayera for di St. Maarten. Marina a logra yega tera i a kuminsá mobilisá pa yuda e pueblo. Pero miéntras e abitantenan ta den nan doló, tin ku ta hasi uso di e oportunidat pa hòrta i atraká.

EXTRA a haña diferente reakshon di personanan ku entre otro a bai buska refugio den hotèlnan ku si a keda riba pia, i ku nan a keda hòrtá òf a bira víktima di atrakonan. I mas tristu ta ku nan no tabata sa ken pa yama ya ku polis tampoko tabata aksesibel. For di Kòrsou Rode Kruis ta preparando pa sali, pero ainda mester warda laga e orkan Jose pasa bai.

Saba

Marina Real a kuminsá hasi trabounan di limpiesa na e isla di Saba. E isla no tabatin hopi daño kousá pa hopi bientu fuerte di pasada di Irma.   Gezaghebber dje isla  Jonathan Johnson djárason den deklarashon pa EXTRA a indiká ku Irma no a laga víktimanan tampoko riba e isla. Diferente kas a pèrdè nan dak, tambe diferente palu a kibra. E abitantenan mesora despues ku e sistema aki a pasa e isla i kos a bira mas kalmu, den oranan di mèrdia a kuminsá limpia e kayanan kaba. Ayera a haña èkstra man di Marina real pa limpiesa.

Yudansa a yega St. Maarten ayera

Yudansa a yega St. Maarten ayera na momentu ku e barku Pelikaan di Marina  a mara na haf di kònteiner di St. Maarten i tabata pensa di mara e otro na e pir kaminda kruseronan ta mara. Ayera Pelikaan a regresá Kòrsou pa rekohé mas produkto di  yudansa, miéntras Zeeland a bai for di den haf di St. Maarten debí na e orkan Jose ku lo pasa banda di St. Maarten djasabra. Promé ku a mara Pelikan, a inspekshoná e wafnan promé si tur kos ta bon. Mesora Pelikan a mara kuminsá desembarká ekiponan manera trùk i tambe loader i otro ekiponan i artíkulonan di yudansa.

Tabatin kosnan di Krus Kòrá, manera tentnan, “seil”, kuminda, awa pa bebe i tambe kahanan di higiena ku habon, pasta di djente, skeiru di djente etc. Tambe e barku a baha trùknan di awa, un Ambulans, buldozer i otro trùknan pisa. Ayera den oranan di  atardi, un avion di Wardakosta Kòrsou a hasi un buelo di prueba pa baha riba e aeropuerto di St. Maarten ku tabata un poko destruí.

Ta spera ku den kurso di awe otro avion ta baha na St. Maarten ku yudansa for di Ulanda. Te ku djasabra mainta e promé avion ku èkstra militar ku a sali ayera for di Ulanda lo baha na St. Maarten. Ámbos avion ku ta bayendo St. Maarten lo baha promé na Kòrsou i for di aki sali bai St. Maarten. Segun informe for di Ulanda e avionnan lo bin kargá aparte di algun shen militarnan ulandes, i tambe lo tin tonelada di kuminda i awa pa St. Maarten. Ta trata di un avion KDC-10 i un C-130 Hercules.

Minister Ronald Plasterk a informá ku tin un morto den e parti ulandes di St.  Maarten, miéntras tin vários persona heridá. Na St. Maarten franses tin 4 hende a fayesé. Loke ta di lamentá ta ku hendenan ta plunder lugánan i bai aparatonan elektróniko i tambe komestibel. Riba vários imágen ku nos a mira, ta kita garoshi di komestibel for di hendenan ku a kuminsá hòrtá kos for di establesimentunan ku a  sufri daño.

Ulanda a manda awa tambe pa St. Maarten. Riba e avionnan tin instalashonnan ku por krea awa pa bebe. E fondo nashonal di Kalamidat di Ulanda a pone 2 mion euro for di nan reserva pa yuda restablesé St. Maarten. Ayera den oranan di anochi St. Maarten a haña atvertensia di orkan Jose, miéntras Saba i Statia tin atvertensia pa un Ola tropikal.

EXTRA ta presentá un sèt di potrèt awe di marina i tambe di nos amigu Kurt Luckerts kende apesar di e situashon ku e tambe ta aden a kontribuí te kaminda e tabata por. E potrètnan ta di e situashon na St. Maarten i tambe Saba.