WILLEMSTAD.- E hòmber Q.N. (32) a keda kondená na un kastigu di 16 luna kual 9 kondishonal durante kasonan di mula, den su ousensia.

Q.N. ta keda akusá di kier a transportá un kantidat di 627 gram di koka, den forma di pasta.

Segun e prosèsverbal, e akusado a yega Hato ku e intenshon pa biaha pa Hulanda.

Durante kontròl e personal di duana a ripará ku e akusado ta aktua basta sospechoso.

Despues di a listr’é, na su paña, no a haña nada. Ora  ku a listra e tas ku e tabata biaha kuné, a deskubrí bòmnan falsu ku koka na pasta.

E akusado a atmití su kulpa na polis i a bisa ku e kier a transportá e droga pa 4.500  euro.

E tabata traha i tabata pendiente pa su pago, pero a pèrdè su trabou.

E tin un yu ku a nase i e mester sòru pe. Tambe e tin debe atrasá di flèt pa paga.

Esaki a pone ku el a kai den desesperashon i a bai di akuerdo pa transportashon di droga.

El a  bisa di a bai serka un konosí  band’i kas ku a regla un hende pa e pasamentu droga. E lo no duna nòmber pa evitá ku e ta hañ’é den problema. El a bisa ta su mes eskoho i p’esei ta para tras di loke el a hasi.

Fiskal a bisa ku normalmente e kastigu pa e kantidat di droga ei lo tabata 18 luna di prizòn, pero e ta tene kuenta ku e droga tabata na pasta i 20 porshento ta wòrdu kitá afó.

Mirando esakinan fiskal a demandá e akusado na 16 luna di kual 9 kondishonal ku un periodo di prueba di 3 aña.

Hues den  su desishon no a mira motibu pa desviá i a bai di akuerdo ku e demanda di fiskal.