Awe mainta a drenta e tristu notisia ku e siklista Manrique Dominico Lodewijks, nasé na Kòrsou 12 di mei 1958 a bin fayesé pa motibu di e aksidente riba Caracasbaaiweg djamars último. Kondolensia na famianan i pas na su restunan

=====

WILLEMSTAD.- Situashon di e siklista ku a keda alkansá djamars último ta sumamente preokupante.

Kontrali promé informenan ku a kuminsá sirkulá, e siklista no a bai dal den e vehíkulo. Ta e vehíkulo a lora dilanti e siklista sin duna preferensia. Djamars alrededor di sinku pasá di seis di atardi, Sentral di Polis a haña notifikashon ku un aksidente di tráfiko ku herido a tuma lugá riba Caracasbaaiweg. E unidat polisial ku a yega na e sitio a topa ku un hòmber siklista drumí riba kaya.

For di un investigashon ku polis a hasi na e sitio a resultá ku un vehíkulo tabata kore riba Caracasbaaiweg den direkshon di Saliña. Shofùr di e vehíkulo aki a bai lora na man robes pa subi lugá di parker di un kompania nèt na momentu ku e siklista riba su baiskel tabata aserkando for di direkshon kontrali i el a alkansá e siklista.

Ambulans a transportá e víktima ku urgensia pa C.M.C. pa tratamentu médiko mas avansá.

E siklista ta interná den CMC ku un situashon preokupante i ta teme pa su salu. Departamento di Tráfiko ta kontinuá ku e investigashon.