Trahadónan ta hañando splikashon i informashon di gerensia awor aki

WILLEMSTAD.- Tin klaridat pa loke ta trata e situashon di trahadónan di e kontratista Dick & Doof. Manera EXTRA a informá, a surgi un situashon di tenshon awe mainta na momentu ku trahadónan di kontratista a yega porta di Isla i tuma nota ku nan no por drenta. Isla a kanselá e pas di tur e trahadónan una bes ku a konsiderá ku no tin trabou pa nan riba tereno di Isla. Minister di labor a kai den e asuntu i resultado ta ku awe tardi departamentu di labor ta saka e pèrmitnan ku e kontratista a pidi. Awor aki gerensia di e kompania ta kombersando ku su empleadonan, asina e direktor mes a duna di konosé na EXTRA.

Den kombersashon ku e lider sindikal Alcides Cova, presidente di e sindikato ku ta representá trahadónan di kontratista SGTK, el a indiká ku e situashon aki a kousa un tenshon enorme awe mainta. Echo ta ku e kontratista a hasi petishon na SOAW masha dia pa duna retiro na e trahadónan, konforme loke lei ta stipulá, pero no a haña kontesta ainda. Sinembargo awe mainta e asuntu a brua na momentu ku e trahadónan a nota ku nan no por subi tereno di Isla mes mas. E trahadónan i nan sindikato ta bisa ku segun lei mientrastantu ku e kontratista no a haña pèrmit pa duna retiro na e trahadónan ku e trahadónan mester sigui taha i konsekuentemente nan mester kobra. Den e kaso aki nan no por a subi tereno di Isla mes.

Cova a sigui bisa ku mesora a tuma kontakto ku tur e partidonan embolbí i mas despues minister di labor tambe a buska informashon di e kaso. Den traimèrdia a sigui un reunion ku tur partido na mesa i for di e reunion ei a resultá ku awe tardi e kontratista ta haña e pèrmitnan pa retiro manera el a pidi. E sindikalista a sigui splika ku ya kaba e kompania a prepará un plan di retiro ku benefisionan pa e trahadónan ku mester bai kas. EDXTRA a papia brevemente ku e direktor di e kontratista sr. De Freitas pero e tabata dunando informashonnan su empleadonan. Mas lat el a keda di duna mas informashon.

Situashon di tenshon riba tereno Isla

Kontratista a pidi retiro pa trahadónan miéntras Isla a kanselá tur pas pa subi tereno

WILLEMSTAD.- Na e momentunan aki a surgi un situashon serio riba tereno di refineria Isla, despues ku a bira konosí ku un kompania kontratista grandi D. a pidi retiro pa e trahadónan. E situashon a bira mas fèrfelu pasobra e kontratista no a haña outorisashon di departamentu di Asuntunan Laboral pa duna retiro na e trahadónan, pero Refineria Isla si a kanselá tur pas di entrada. Esaki ta nifiká ku trahadónan no por subi tereno di Islam as pa bai traha.

A surgi un situashon di basta tenshon pasobra trahadónan ta pensa ku miéntras ku SOAW no duna pèrmit pa nan retiro nan ke sigui traha te na e último momentu. Trahadónan no ke pèrdè nan pan i p’esei ta bira hopi disgustá.

Lider sindikal Alcides Cova a konfirmá esaki pa EXTRA, indikando ku djis un ratu pasa el a tuma nota ku minister di labor a buska kontakto ku Isla i tur otro partidonan embolbí pa haña un reunion awe mes ainda pa atendé ku e asuntu aki. EXTRA ta keda pendiente i lo trese mas informashon asina ku esaki ta optenibel.