WILLEMSTAD.- Funshonario di Xteam ayera mester a bai den Suffisant nèt patras di e stadion Odulio Willems, pa asina atendé ku un situashon hopi a-higiéniko i desagradabel.

Segun por a komprondé na e sitio for di un habitante, ya pa algun siman tin un situashon kaminda un pipa di awa di fekalia ta pasa a verstòp i otro ku a kibra. Esaki a trese kuné ku awor awa sushi ta subi riba e kaminda ku basta hende sa kana. Asta bichi a kuminsá penetrá den e awanan aki.

E funshonario di Xteam ku a presentá na e sitio a tuma nota di e situashon i a pone e instansianan konserní na altura. E pipa ku a kibra mester keda atendé pa DOW miéntras ku Selikor mester atendé ku e pipa ku a verstòp.

Ta spera ku e instansianan konserní atendé e situashon aki mas lihé posibel mirando ku ta un holó hopi desagradabel tin den e área.