WILLEMSTAD.- Un biaha mas Sentro di Detenshon i Korekshon Kòrsou (SDKK) ta den un lus negativo. Aparte di tur e desaroyonan negativo ku a bini den medionan di komunikashon durante di e último dianan, awor ta reina otro situashon sumamente kaótiko.

Departamentu di barak kaminda ta enkarselá personanan indokumenta ta kompletamente yen te ku no tin espasio pa pone ningun persona mas.

Den un kombersashon ku EXTRA a hiba ku Direktor di SDKK Sr. Urny Floran, e la konfirmá e informe aki pa EXTRA. “Aktualmente tin 101 persona indokumenta enkarselá lokual ta dòbel i pasa e kantidat di personanan indokumenta ku normal por keda enkarselá”, segun Floran.

EXTRA a komprondé ku e 101 persona nan ta inkluí tantu muhé komo homber. Ta laga e personanan aki lucht mas tantu posibel pero esei ta nifiká tambe ku bo mester di EXTRA wardadó di prezu ku tur konsekuensia ku esaki por trese kuné.

Simplemente no tin lugá pa ningun persona indokumenta mas.