Akusado ke traha i bende produkto di mariwana

WILLEMSTAD. - E hòmber R.H. (44) resientemente a keda kondená na kastigu kondishonal i tambe 240 ora di trabou pa komunidat, pa poseshon di 13 kilo mas 370 gram di mariwana.

Segun e akusashon t’asina ku dia 23 di mei último R.H. tabatin e kantidat di mariwana ariba menshoná den su poder.

R.H. ku tabata den libertat pendiente tratamentu di su kaso, a bisa ku e ta atmití ku e kantidat di mariwana ku a konfiská durante un entrada hudisial na su kas ta di dje.

El a splika ku tabata promé bia ku el a bai trata na planta algun mata di mariwana, pasó e tabata ke tin su propio plantashon pa e por huma.

Segun e akusado, banda di esaki su ideanan tabata pa traha produktonan ku su blachinan, mirando ku dor di COVID-19 kos tabata malu pa hopi hende.

R.H. a bisa tambe ku e ta un bendedó di mata normalmente kual e ta gana su sèn kuné, pero nunka el a bende  mariwana

E akusado a desmentí e peso di mariwana ku e ta keda akusá di dje. El a bisa ku e no ta kuadra ku e loke nan a haña na su kas. Segun e akusado e ta konvensí ku asta e takinan di e blachinan polis lo a konta aden, ku nan a yega e kantidat ku nan ta akus’é di dje.

Hues a relatá ku na aña 2008, tambe el a keda kondená na lei di opio.

Durante e rekisitorio, fiskal a bisa entre otro ku e no ta kere e historia di e akusado ku tabata pa su propio uso, mirando e kantidat di e matanan ku a haña na su kas. Segun fiskal mas aleu, pa un kantidat asina grandi ku a keda konfiská por papia sigur di 21 luna di prizòn.

Pero e lo tene kuenta ku e akusado a koperá bon ku hustisia i pa ku esei sigur e lo haña rekompensa.

Mirando tur esakinan fiskal a yega na un demanda di 18 luna di kual 6 kondishonal ku un periodo di prueba di 3 aña.

E akusado a bisa ku e no ke bai será mas, pasó e ta esun ku ta sòru pa su famia.

Abogado mr Athena Sulvaran  den su defensa, a trese dilanti ku e kantidat di kastigu ku fiskal a pidi ta eksageradamente haltu. Segun e abogado tabatin otro kasonan similar, pero ku e akusado a  haña hopi mas tiki kastigu.

Hues Verbeek den su desishon a bisa ku e no ta mira motibu pa bolbe manda e akusado prizòn, pasó ya a suspend’é su detenshon. Tambe hues a haña ku e parti personal ku el a bisa ku e tin ku sòru pa su famia den e kaso aki tambe ta pisa. Mirando tur esakinan hues a yega na un kondena di 360 dia di kual 320 kondishonal mas 240 ora di trabou pa komunidat.