WILLEMSTAD.- Diferente servisionan hulandes ku ta investigá terorismo, di inteligensia i di inteligensia militar resientemente a hasi análisis profundo di situashon di seguridat mundial. E diferente organisashonnan a traha un rapòrt huntu. Den e rapòrt ta skirbi ku situashon na Venezuela ta un menasa potensial pa Reino Hulandes. Den e rapòrt ‘Dreigingsbeeld Statelijke Actoren’ ku ministernan di Hustisia, di Defensa i di Relashon Interino di Hulanda a entregá e siman aki na parlamento hulandes tin basta atenshon pa situashon na Venezuela. Pero tambe na otro pais na mundu.
E konklushon di e rapòrt den e kuadro di Venezuela no ta un sorpresa grandi. E ta bisa ku situashon na Venezuela no ta stabil. E servisionan di inteligensia ta bisa ku e pais bisiña mas grandi di Reino Hulandes ta un menasa potensial pa integridat teritorial di Reino Hulandes.
Na mesun momentu e rapòrt ta skirbi ku e chèns no ta grandi ku Venezuela lo kuminsá ku un konflikto militar ku Reino Hulandes. Pero tin chèns di ‘eskalashon involuntariamente’ dor di posibel mal interpretashon. Tambe e rapòrt ta bisa ku profeshonalismo militar na Venezuela a baha hopi den e último añanan. Esaki por kousa posibel insidentenan.
E rapòrt hulandes ta bisa ku: ‘Den e kaso ku gobièrnu di presidente Nicolas Maduro ta bai i Venezuela lo konosé un gobièrnu nobo; ta hopi improbabel ku e situashon aktual, ku no stabil, lo drecha.’ Ku otro palabra, segun Hulanda situashon na Venezuela lo keda instabil pa basta tempu.
Segun e rapòrt Venezuela ta konosé un krísis ekonómiko i polítiko for di aña 2017. Situashon di inseguridat i instabilidat probablemente lo sigui pa basta aña.
E rapòrt ‘Dreigingsbeeld Statelijke Actoren’ a keda trahá dor di e siguiente instansianan:
-Algemene Inlichtingen- en Veiligheidsdienst (AIVD);
-Militaire
Inlichtingen- en Veiligheidsdienst (MIVD);
-Nationaal Coördinator Terrorismebestrijding en Veiligheid (NCTV).