WILLEMSTAD.- EXTRA a tuma nota di un situashon basta peligroso na subida di Julianabrug. Ta trata di e subida di Punda pa bai Otrobanda.
E heru na rant di e brùg ta kibrá i putrí. Tur ku ta subi por tuma nota di e situashon aki. Kisas ta den un di e aksidentenan ku a tuma lugá esaki lo a keda okashoná pero e ta rekerí atenshon rápido di outoridatnan kompetente.
E mobilario di kayanan di Kòrsou konstantemente ta bira víktimanan di aksidentenan di tráfiko. Te kaminda EXTRA ta na altura ta seguro di outonan ku okashoná esaki lo tin di kubri e gastunan pero nos a komprondé ku Servisionan di gobièrnu hopi biaha tin di bai investigá ta kua aksidente i ta kua seguro lo tin di karga e gastunan.
Esaki tambe ta un di e gastunan ku ta primi riba presupuesto di gobièrnu, ya ku tin di drecha loke otro okashoná daño na dje. Den e kaso di Brùg Juliana no ta konosí pa nos presis ta kon e heru na rant di brùg ta den e situashon aki. Pero nos kier a pidi instansianan konserní pa tuma nota di e situashon.