WILLEMSTAD.- EXTRA a keda den shòk despues di un bishita na playanan públiko pabou di brùg.

EXTRA a bishitá Daaibooi, Sta Cruz, Lagun, Jeremi, Playa Kenepa Chikí, Kenepa Grandi, Playa Fòrti, Playa Piskadó i Playa Kalki. E situashon di e playanan ta desastroso.

Ora e produkto turístiko ta keda merkadeá, por mira playanan bunita, limpi, atraktivo, pero loke nos a tuma nota di dje no ta loke realmente ta bendiendo e turistanan.

EXTRA ta realisá e reportahe aki, despues di a hasi esun na e playa públiko di Sonesta i ku siguiente dia e departamento di desaroyo di produkto di CTB a bai limpi’é huntu ku kontratistanan. EXTRA ta spera ku e reportahe di e playanan na Banda Bou lo por haña atenshon di gobièrnu pasobra e situashon ta espantoso. I mas ainda mirando kuantu esfuerso ta hasiendo pa trese turista Kòrsou; na luna di novèmber próksimo Kòrsou lo haña 17 buelo nobo ku ta nos deseo pa tur bini yen di turista pa konosé nos isla. Pero nos tin di sòru pa nan bishita ta agradabel i pa e no keda na un biaha so. Nan tin di bin bek i nan tin di bai konta kon bunita i dushi Kòrsou ta. I p’esei ta asina urgente pa nos produkto ku ta bende e turista ta optimal. Pasobra loke nos a tuma nota di dje si ta un desaster.

Playa di Daaibooi

Daaibooi mester haña atenshon lihé pasobra e edifisio ta den situashon deplorabel i un momentu pa otro por basha den. E edifisio no ta higiéniko, den un palabra un desaster total.  E parti di parker ta laga di deseá pasobra mester drech’é kompleto pasobra ta porkeria.

E mobilario di playa esta e palapanan ta tur destruí i mester keda drechá.

Playa di Sta Cruz

Playa Sta Cruz tambe ta un problema serio. Ei bou kasi mayoria wc i baño ta será i esnan habrí mes ta den mal kondishon. E mobilario di playa ta den mal kondishon. E kompleho di piskadónan ta un desaster total i mester drech’é i pone e playa funshoná manera mester ta. Mester hasi un limpiesa grandi na e lugá di parker outo i pone opstákulonan ku outonan no por subi bai te riba e playa.

Playa di Lagun

Na Playa di Lagun e kompleho trahá einan pa piskadónan warda nan nèt i wc, for di dia a trah’é nunka a habrié. No sa mes unda e yabi ta. Na Lagun tin un kompleho trahá ku tin peliger grandi  pa basha i asta tin bòrchi poné einan pa hende no sinta ei bou pero tòg no ta bash’é abou. I EXTRA a tuma nota ku hende tòg ta bai sinta ei bou, ku tur e peligernan ku e ta trese kuné. I finalmente si algu pasa ta ken ta para responsabel.

Tambe tin kompleho ku gobièrnu a kaba di renová i e ta kla i ta spera ku pronto e ta den uso pa asina tin rekreo einan.

Playa Jeremí

Jeremí ta keda hopi usá pa sambuyadónan pero lamentablemente e ta karesé di tur e fasilidatnan pa ta un playa kompleto. No tin espasio di sanitario, kasi tur e palapanan ta destruí i mester tin mas seguridat einan pasobra e sambuyadónan ta laga nan pertenensianan ariba i tin hopi kiebro. Komo no tin edifisio einan mester traha unu mas lihé posibel i tambe pensa riba un snèk pa e bishitantenan por hasi uso di dje.

Playa Kenepa Chikí

Kenepa Chikí ta desaster total. Tin edifisio einan ku tin hopi aña kaba será pasobra e persona a fayesé. Konsekuentemente niun hende no por hasi uso di baño ni nada. Nada ta wòrdu hasí i einan e playa no ta wòrdu kuidá i  einan tambe tin parasòl i stulnan poné pa hür. EXTRA a keda aserká pa algun bishitante di e playa i asta a reklamá ku nan ta keda obligá pa usa e parasòl i stulnan di hür i no por bai ku esnan di nan. E playa aki tambe ta karesé di regla i legalidat.

Playa Kenepa Grandi

Kenepa Grandi mester basha tur edifisio abou traha kompleho nobo, regulá loke ta pasa ei bou. Nos a tuma nota di asta kònteiner pon’é einan.

Ta un playa ku mester di mas seguridat i einan e parkerplaats mester keda drechá. E palapanan ta den mal kondishon, edifisionan no higiéniko pero si ta mas mihó ku esun na Daaibooi. E wc ta kai bou di e doño di e snek i si e persona yega lat òf no bin, i un hende por hasi uso di e wc nan. E playa aki EXTRA a tuma nota ku ta esun di mas bishitá na Banda Bou.

Playa Fòrti

Playa Fòrti ta un playa kaminda masha poko por keda hasí pero tòg e mester di atenshon. Por traha ariba un mihó lugá di parker ku fasilidat pa sinta i wak solo baha. E trapi ta den estado deplorabel i peligroso. EXTRA a papia ku algun habitante ei bou i nan a splika nos ku ta debí na falta di mantenshon ku e trapi a bira asina. Tambe e playa mester di algun parasol.

Playa Piskadó

E playa aki últimamente a bira un atrakshon turístiko. Bon òf malu e mester di atenshon urgente di gobièrnu. Den e siman aki kaba tin un parlamentario ku a laga su bos resoná mustrando su preokupashon ku e playa di Piskadó. Einan tin turtuga i turistanan ta bin landa ku e turtuganan. Hopi outo, konvoinan di turista ta sera e tráfiko pa e playa. Piskadónan a kuminsá reklamá ku e originalidat di e playa a disparsé i nan tin miedu pa kos no sali for di man pasobra nan ta keda stroba den nan trabou diario. Tin asta awor un trùk di bendementu di kos pará einan i e piskadónan ke sa si e tin pèrmit di gobièrnu pa ta einan. E uso di awa a bira un free for all kaminda kualke hende por yega i yena kònteinernan di awa i bai kuné pasobra tòg ta gobièrnu ta paga. Mester atendé ku playa Piskadó urgentemente.

Playa Kalki

Playa Kalki ta esun mas trankil i ku mihó kondishon. Esaki komo ku hotèl Kura Hulanda Lodge ta sòru pa e playa aki. Tin asta un pòrtir pa wak outonan na e playa, ku tòg no ta sufisiente. E playa aki tambe mester di atenshon  i ta bon pa drecha e parti di santu, ya ku e ta kompletamente kubrí na piedra.

Atenshon pa sushedat

Segun EXTRA a komprondé for di e investigashon i kombersashon ku nos a hiba ku bishitantenan regular, sushedat ta un problema grandi na e playanan. E echo ta ku tur tin kònteiner di sushi pero ta un biaha pa siman parse ku Selikor ta para i rekohé esakinan. Por ehèmpel na Playa Kalki tin un kònteiner mas grandi pero hürdónan di wikènthùisnan tur ta bai depositá nan sushinan den e kònteiner grandi, konsekuentemente ora e yena or mira baki di fom ta bula aki i aya.

Gobièrnu lo tin di pone atenshon urgente pa drecha playanan. Si nos ta propagá e turista ku nos ta un dushi isla, playa bunita, mester laga esaki ta bisto realmente. No laga pa e esfuersonan ku CTB ta hasiendo pa trese turista Kòrsou keda na esfuerso so, pero drecha e produkto ku ta bendiendo mester ta real i no un engaño.