WILLEMSTAD.- E situashon den kaya ayera nochi tabata unu praktikamente for di kontrol. Tabata e promé dia di suavisashon di medidanan. Toke de Keda a kambia di 11 pa 12 or di anochi te mitar di 5 di mainta.

Establesimentunan por keda habri mas lat i asta por tin hende pa weganan deportivo, pero moderá.

E situashon sinembargo di ayera nochi no tabata nada moderá. Ta manera a habri kura kaminda tur hende tabata sera i nan a basha subi kaya, Sta Maria tabata di chòk, Saliña di chòk, tur kaminda ku sa tin aglomerashon na establesimentunan ku ta atraé hende riba djabièrnè no tabatin lugá pa niun feneta.

Pero mas tristu ta ku e polis a bria ku su ousensia riba kaya. Úniko kaminda ku tabatin algun polis i K-mar ta kontrolá tabata den bisindario di Dr Maalweg. Sobra tur tabata pa nan kuenta.

Kisas mas den oranan di anochi, ora e toke de keda ta yegando e polisnan lo a subi kaya, pero esei nos a bai imprenta kaba.,

Nos ke kòrda tur hende ku e gosamentu a hasi falta pero kòrda ku kasonan di Covid tei bibu ainda. Laga nos gosa pero ku moderashon pa evitá oumento di propagashon di e vírus di Corona.

LAGA UN KOMENTARIO

Please enter your comment!
Please enter your name here