10:15 am:

Ayera, djaweps 8 yüli 2021, nos selekshon a hasi algun tèst, segun e prosedura nòrmal di CONCACAF pa ku Covid-19 i a resultá ku algun di nos hungadónan i parti di nos staf a sali positivo pa e vírùs. Awe nos delegashon lo hasi e último test i si resultá ku 50% òf mas ta positivo, lamentablemente nos lo no por partisipá mas na Gold Cup 2021. Sinembargo, si nos sigui den Gold Cup 2021, Kòrsou tin e opshon pa añadí mas hungadó na nos selekshon. Awe durante dia lo tin e resultadó di e último tèst ku lo ta desisivo pa ku nos partisipashon den Gold Cup 2021.

Keda pendiente pa nos próksimo relato.

DALLAS.-  Situashon di nos selekshon nashonal di futbòl ta realmente delikado aktualmente, pa ku infekshon di Coronavirus. Mundu Deportivo a bin komprondé ku for di fuentenan basta yegá na e selekshon, ku gran parti di e ekipo a tèst positivo pa Coronavirus. Tin asta indikashon ku a keda di bai hasi un tèst adishonal na un diferente laboratorio, p’asina wak kiko tur ta pasando i kon pa sigui. Mas lat Federashon di Futbòl Kòrsou a saka un komunikado rondó di e situashon di nos selekshon. “Pa medio di esaki Federashon di futbòl Kòrsou ta komuniká ku despues ku nos selekshon a yega Dallas i a hasi e pruebanan nesesario, a bin konstatá ku un parti di e selekshon a tèst positivo pa Coronavirus. Promé ku e biahe, henter e delegashon a tèst na Los Angeles i a sali despues pa Dallas pa nos kompromisonan di Gold Cup 2021. Aktualmente nos ta hasiendo algun tèst mas profundo i ta den kombersashon pa kiko ta e siguiente paso ku nos lo tuma. Asina nos tin mas informashon, nos lo suministrá esaki”, asina FFK a bisa den e komunikado. Pues ku otro palabra, por tin chèns ku nos selekshon nashonal di futbòl, por hañ’é ta retirá for di Gold Cup 2021.