No tin personal pa kuido intensivo

WILLEMSTAD.- Curaçao Medical Center (CMC) den un informe di último momentu ta informando ku nan situashon ta birando ora pa ora mas pèrta. Tin skarsedat di personal di kuido intensivo, esaki tin su konsekuensianan pa pashèntnan ku Covid i esnan sin Covid ku mester di atenshon den kuido intensivo. CMC ta bai eskala pa su otro departamentunan kaminda lo kombertí eseinan tambe den kuido intensivo temporal pa por krea espasio pa mas pashènt. Un di e departamentunan aki ta ‘recovery’, unda un pashènt ku kaba di operá ta keda un ratu bou di kontrol estrikto despues di su operashon. Komo konsekuensia esei CMC ta kanselá mas operashon elektivo, pues hendenan ku tin basta ratu kaba ta warda pa nan operashon mester tende atrobe ku nan no por operá debí ku kantidat di kasonan di Covid a subi i mester di e espasio pa pashèntnan ku Covid.

En total, CMC tin 16 kama pa Kuido Intensivo i 10 Kama pa departamentu di kurason. Huntu ku esaki tin un sierto kantidat di personal spesialisá ta traha ku tin e konosementu pa atendé ku pashèntnan ku mester di èkstra atenshon médiko.  E oumento di pashèntnan den Kuido intensivo den e último dianan a pone ku mester a transladá tur pashènt di Kuido Intensivo ku no tin COVID pa departamentunan di emergensia di kurason i kuido intensivo di kurason. Pues e departamentunan aki tambe a yena. Alabes mester a splet e tim di Kuido Intensivo den e departamentunan aki i reklutá enfermeronan i spesialistanan di otro departamentunan den CMC pa asistí esnan spesialisá den kuido intensivo. Kompará ku e punto kulminante di e pandemia na Aprel ora ku Hulanda a manda 137 spesialista i enfermero pa asistí, na e momentunan aki a sobra solamente 10 ku lo keda te ku fin di ougùstùs. Di e 137 spesialistanan i enfermeronan, 55 tabata enfermeronan di kuido intensivo. Mas detaye den edishon di EXTRA.