SINUSTA: Situashon ta hopi prekario pa taksista nan

Lokal

...sra. Mayra Medina di SINUSTA ku ta indiká ku tur manera e taksista ta haña sla...

WILLEMSTAD.- E situashon di kareda pa taksinan ta keda un problema dor di vários faktor. Un di nan ta ku no tin sufisiente avion ta yega nos isla, ta loke ku presidente di SINUSTA sra. Mayra Medina a duna di konosé na EXTRA.

El a bisa ku un dje problemanan grave ku ta keda t’e echo ku no tin sufisiente avion ku ta yega Kòrsou pa akapará tur e trahadónan ku ta gana nan pan di di kada dia, esta e taksista nan.
Pasombra den promé instansia e “tourwagen” nan ta bai ku turistanan ku yega, aki taksi nan ta pèrdè kliente. E situashon ei ta un echo i ta un realidat ku taksi no por kambia pasombra nan no por bende “all inclusive” via di e sistema di hotèlnan.
Aparte di hotèl, doñonan di apartamentu tambe ta propagá “all inclusive” i ta bin para na aeropuerto di forma ilegal pa bai ku nan klientenan. Nan ta ilegal pasombra nan no tin pèrmit di transporte. I banda di tur eseinan, tin e taksi piratanan ku tin “app” ku ta buska un ke otro manera pa hasi e trabou di taksi ilegal.
Tur esakinan ta pone ku e kompetensia ta hopi fuerte pe taksista, pasombra esnan legal no ta den nan man pa para e ilegalidat ku ta ser kometé. Awor ta otro minister di hustisia tin, i nan di SINUSTA no sa ainda si nan ta bai traha pa komunidat manera nan a bisa. Paso ta e minister di hustisia so por para e ilegalidat aki na aeropuerto.
Entre e taksista nan mes tin problema ku ta lantando dor ku nan a forma grupo traha nan “app” i/òf ta uni ku otro organisashon i traha “app”.
Otro problema ku ta birando grandi ta benta di kareda for di den sala di yegada. CAP ta tuma propaganda i ofresé esnan ku tin sèn, pa pone un “booth” den sala di yegada kaminda ta para bende kareda di taksi. Esaki ta un kompetensia inhustu, pasombra e taksista ku ta para pafó, ku no tin sèn pa paga “booth” pa para den yegada, no ta haña kareda. E situashon a para bira manera algu normal di pelea entre taksi ku taksi. E kos aki ta algu insolito i niun kaminda na mundu na aeropuerto e ta sosodé. Tur kaminda tin “booth”, pero ta para pafó.
Otro problema ku e bendementu di kareda den sala di yegada ta trese kuné ta asuntu di preis. MEO a duna preis mínimo di 15 dòler pa área. E tin su máksimo. E mínimo mester konta pa tur hende segun lei ta preskribí. Paden nan ta bende 10 dòler pa kareda p’e hotèl mas serka di aeropuerto. E turista ta nenga e kareda paden, i ora e sali pafó serka e taksista, aki ta start un “pelea” entre e turista i e taksista pasombra e taksista pafó ta para riba lei di 15 dòler pa transporte.
Sra. Medina a bisa finalmente ku e situashon ta hopi prekario pa taksistanan, i awor a ni yudansa di e gobièrnu (MEO) nan no ta haña ni trabou. Abruptamente a para esaki tambe.