WILLEMSTAD.-Wikènt pasá tabatin sentronan di dibertishon unda situashon a sali for di man ku aglomerashon tresiendo salu na peliger. Ronny Cornelis di MEO a duna di konosé ku despues di e promé fase ku Kòrsou a tuma prekoushon kontra di Covid, e tim di kontròl a slèk pero nan a kuminsá enforsa reglanan di higiena i tambe distansia sosial den lugánan unda tin hopi hende manera supermerkado i tambe sentronan di dibertishon.

Cornelis a enfatisá ku e peliger di Covid no ta un asuntu di gobièrnu, ni di e tim di MEO ni Gerstenbluth i su tim médiko. Cornelis a hasi un apelashon di ruman pa ruman pa yega na distansiamentu sosial. No a yega e punto pa bai sera e lugánan, pero ora un hende ke bai un establesimentu ta bon pa e mes chek si ta un lugá mas sigur. Ta kada hende mester evitá di bai kaminda tin aglomerashon.

Ya kaba a atendé ku komersiantenan ku no ta kumpli. Siman pasá a yama diferente doñonan di klup nokturno i a splika nan kiko ta spera di nan. Djabièrnè a bai bon pero pa djasabra e mesun lugánan a bai kompletamente for di man. Tene kuenta ku ora nan haña keho sigur nan lo aktua. Echo ta sinembargo ku no tin sufisiente polis ni funshonarionan di MEO pa hasi kontròl i p’esei ta importante pa kada siudadano yuda outoridatnan i denunsia esnan ku ta faya ku regla i medidanan. Imro Zwerwer bosero di Kuerpo Polisial na su turno a splika ku polis lo sòru di hasi nan trabou mas tantu posibel. Kontrali na e  situashon di lockdown awor mester repartí tareanan den órden públiko ku kombatimentu di kriminalidat tambe.

For di siman pasá kontròlnan a kuminsá, speshalmente kontròl na sitionan ku tin aglomerashon. Polis tin informashon ku tin organisadónan ku ta kontemplando pa tene fiesta klandestino. Polis ta investigando i esnan ku a pensa e tipo di evento aki mihó nan legumai. Polis tin informashon i lo bai tuma medida kontra esnan ku hasié. Mas detaye den edishon di EXTRA.