WILLEMSTAD - Awe alrededor di 09.54’or, Sentral di polis a dirigí unidat di Barber pa Weg Naar Westpunt na altura di Duzu, pa un vehíkulo ku despues di a aksidentá, a bai resultá parsialmente di bòltu kantu di kaminda i pega kandela.

Personanan ku tabata den e besindario mesora a drenta akshon i a fia un aparato di paga kandela na un establesimentu ei banda, miéntras otronan a yuda saka e okupante for di e outo ku a kuminsá kima.  Bon trabou di e siudadanonan aki a sòru pa tantu daño personal komo daño material keda limitá. No tabatin nesesidat pa transportá e okupante pa hospital.