WILLEMSTAD.- Siudadanonan mes a kuminsá buska opshon pa evitá aksidente.
Kaya Mila nèt den e bògt ku ta krusa ku Acasiastraat ta un kaminda ku praktikamente tur dia tin aksidente ta tuma lugá.

E aksidentenan ta surgi mayoria biaha pa akseso di velosidat i nèt den e bògt ariba menshoná outomobilistanan no ta mira si tin vehíkulo ta aserka riba man kontrali.

Na vários okashon tabatin aksidente di atenshon i te asta aksidentenan kaminda a basha kura di kas di hende abou. Pa basta tempu komersiante i abitantenan di e área a bati na porta di diferente instansia pero sin ku e resultado deseá. Awor siudadanonan mes a opta di pone un pida spil wanta ku palu. Esaki ta yuda i hasi e visibilidat di outomobilistanan un poko mas fásil.

Esaki kisas por yuda un tiki pero lo ta muchu mas mihó pa e instansianan konserní pone drèmpel pa asina baha velosidat di outomobilistanan ku ta frekuentá den e área.