SVB: Grupo 0-18 aña mas ku 30.000

WILLEMSTAD.-Kuido médiko den tur pais ta algu sumamente esensial i importante ya ku un poblashon salú por produsí mas. Pa algun tempu kaba por a skucha lidernan den e pais aki indiká ku gastunan di kuido médiko ta sigui subi miéntras ku esnan ku mester kontribuí na e totalidat kasi no ta krese i den sierto momentu asta ta bira ménos. Investigashon di EXTRA ta mustra ku tin grupo relativamente grandi di siudadano ku no ta pagando niun kontribushon, pero si ta risibí e kobertura di malesa.

Un bista den e relato anual di 2022 di Banko di Seguro Sosial (SVB) ta mustra ku den último añanan (2018 – 2022) e kantidat di aseguradonan na SVB a baha tambe, di 149.000 (2018) pa alrededor di 140.000 na 2022. E kontribushon di gobièrnu na e fondo di malesa ta varia, di 276.000 (2018) pa 278.000 (2022. Esaki ta debí ku lei ta stipulá ku na momentu ku un di e fondonan di SVB tin un défisit ku gobièrnu mester duna un kontribushon pa stabilisá esaki. E gastu promedio pa kuido médiko pa kada pashènt sigurá na SVB ta alrededor di 3900 florin pa aña. Por sierto el a subi kompará ku 3500 florin pa aña na 2018.

Den pasado SVB tabata risibi kontribushon di Fl 82 di kada asegurado, pero esei no ta asina mas. E direkto a indiká ku nan no tin bista riba esaki ya ku SVB ta haña un sierto suma di gobièrnu. Ta loke gobièrnu pone disponibel pa SVB nan mester traha kuné. EXTRA a puntra direktor di SVB sr. Phillip Martis si e por informa kuantu kiko ta e kantidat di hende entre 0 – 18 aña ku ta sigurá na SVB, ta gosa di tur kobertura pero pa un òf otro motibu no ta kontribuí ni nan mayornan no ta kontribuí pa nan. E kantidat ta riba 30.000, asina Martis a duna di konosé na EXTRA. Mas detaye den edishon di EXTRA.