...Ta den kada un di nos ku ta biba riba e dushi isla aki su mes man pa disidí skapa nos isla for di kai den e gara di e pandemia di COVID-19. Awor aki no ta momentu pa kuestioná ni hustifiká kontra di medidanan ku gobièrnu a anunsiá ayera. E medidanan aki tin un solo meta; pa skapa Kòrsou. I ora nos ta papia di Kòrsou nos ta papia di kada un habitante riba e dushi isla aki.

E situashon aktual no ta unu di fiesta. No mira e echo ku banko a duna 3 luna di grasia pa paga fiansa bèk komo un espasio finansiero pa gasta bai gol. No mira e echo ku vários empresa a sera pa públiko i muchanan ta na kas pasobra skolnan tambe ta será komo un fakansi. No mira e medida ku no por tin aglomerashon di mas di 10 hende huntu komo un eksagerashon. No mira e echo ku ora bo drenta Kòrsou i bisa bu pa keda 14 dia den karentena na bo kas komo un medida saká dor di su konteksto.

Djis mira kiko a pasa na un pais grandi manera Italia. Un pais desaroyá ku tur e fasilidatnan i awe ta kasi na flur.

Te ainda aki na Kòrsou tin 3 persona ku Corona Vírus detektá. Nos por want’é basta nos ke. E simpel regla ta higiena i sigui e medidanan ku e outoridatnan máksimo ta imponé, no pasobra nan ke pero pasobra nan tambe ta kere ku ta esaki mester sosodé pa por skapa nos dushi Kòrsou. I ku tur seriedat ban den orashon awe mitar di 1 di mèrdia. Laga tur kos ku bo ta hasiendo para, sende lus den outo i reflekshoná, hasi orashon pa nos por sali mihó posibel for di e situashon di krísis aki. Union ta hasi forsa i den e kaso aki mas ku nunka!