Fundashon Falki Aviation ta señalá

KRALENDIJK.- Fundashon Falki Aviation Boneiru i Kòrsou den su análisis anual a nota ku tin skarsedat di pilotonan lokal. E motibu di e skarsedat aki tin mará na diferente faktor.

Un kantidat grandi di pilotonan ku a kaba nan estudio a haña trabou na aerolíneanan lokal  manera Divi Divi i Winair. Por a nota un fluho di pilotonan ku a kaba estudio mas o ménos 3 aña pasá, ku a kue eksperensia na Divi Divi por ehèmpel a move pa EZAir. Un grupo di kapitan di Divi Divi, èks pilotonan di ALM i InselAir a move sea pa Jetair òf a haña trabou den eksterior durante e último dos añanan. Pues por papia di basta moveshon di pilotonan di un aerolínea pa otro.

E moveshonnan di e último dos añanan aki ta kreando espasio pa pilotonan nobo. E estudio di piloto no ta unu barata. Falki Aviation komo un fundashon ku su meta prinsipal ta pa duna informashon, guia i train pilotonan na Boneiru i Kòrsou ta hasi un rekomendashon na hóbennan ku ta sinti e afinishon pa bira piloto sea privá òf komersial pa probechá di e desaroyo aki.

Djasabra awor lo kuminsá ku un klas nobo di piloto privá na Kòrsou siendo ku na Boneiru lo kuminsá ku unu pronto, dependé e interes.

Falki Aviation ta disponé di 3 avion di tipo Cessna 172 i un Cessna 182 pa duna instrukshon privá riba nan.

Meta di Falki ta pa habri kaminda pa esnan ku ke sa mas i ke bira piloto pa por hasi esaki hasiendo uso di tur e rekurso i konosementu ku el a optené atraves di añanan riba e tereno aki.

E futuro pa pilotonan lokal ta mustra prometedor tantu na nos islanan komo den eksterior. Un studiante ku yega serka nos ta haña tur informashon ku e mester pa por tuma un desishon di por ehèmpel unda e por hasi su estudio.

Por inskribí ainda pa e kurso ku ta kuminsá djasabra awor. Pa mas informashon por yama  +5999 526 2819 via WhatsApp òf +599 9 525 5282. Ta bon pa menshoná ku for di 2011 pa awor Falki a yuda produsí sigur 40 piloto tantu lokal komo pilotonan di afó manera di St. Eustatius, Aruba i Hulanda. Hopi dje pilotonan aki ta bulando komersialmente na aerolíneanan siendo ku tin un grupo ku ta bulando privá pa rekreashon.