Entrante awe EXTRA ta kuminsá ku un kolumna titulá Skèpsis, skibí pa un grupo di profeshonal, konosí pa EXTRA, preokupá ku nos salubridat. Awe e promé ta trata Ayurveda.

No muchu tempu pasá Minister di Salubridat señora Camelia-Römer a biaha pa India, kompañá pa algun ámtenar, pa partisipá na un kongreso tokante ayurveda. Esaki en konekshon ku minister su maneho pa loke ta trata “e sistema di medisina di forma alternativo” ku e ke inkorporá den e pakete di salubridat públiko na Kòrsou.

Ayurveda ta un sistema di medisina alternativo ku a originá na India. Den algun investigashon a keda sugirí ku entre e produktonan ku ta usa pa ayurveda por tin algun ku, si sigui desaroyá nan, lo por bai usa komo remedi ku supstansia aktivo ku ta funshoná. Pero no tin prueba ku esaki ta e kaso, segun World Health Organization.

Tin investigashon hasí na Merka na 2008 ku ta proba ku 21% di e remedinan usá pa ayurveda, optenibel via di Internet, aparte ku no tin prueba ku nan tin efekto, ta kontené metal pisá dañino (venenoso) pa hende su salú, manera por ehèmpel chumbu, merkurio i arséniko.

E invitashon ku ministerio a haña a bini di e minister di Ayush, di e ministerio di medisina alternativo di India. Ku no tin mag di konfundí ku e ministerio di salubridat públiko di India.

E minister aki, Shirpad Naik, ta un negoshante ku ta proklamá riba su wèpsait ku por kura kanser ku yoga i ku por prevení coronavirus ku dos gota di zeta di zjozjolí den nanishi diariamente.

Ministerio di Salubridat di Kòrsou ta planiando pa introdusí un sentro di “Bienestar” (Wellness) den e edifisio di sentro komersial Colon, den kua diferente disiplina alternativo lo ta representá, entre nan ayurveda.  E plannan akí lo kosta komunidat miónes di florin. Segun gobièrnu esaki lo tin balor agregá pa nos salubridat públiko. E kos aki ta kuadra? Unda prueba sientífiko di esaki a keda? Unda ta prueba ku e medisina alternativa lo tin un efekto positivo riba nos komunidat ku esaki ta nifiká al final ganashi di salubridat pa nos isla?

Di otro banda sí, tin señalnan alarmante for di gruponan di dòkter i otro profeshonal di salubridat na Kòrsou ku ta mustra riba e daño ku tratamentu di praktikantenan di medisina alternativo ta kousando. Ademas nos salubridat públiko tin falta di sufisiente medio finansiero riba tur tereno, loke ta pone ku no por kumpli adekuadamente ku nesesidatnan básiko.

Ta parse tambe ku kasá di sra. Camelia-Römer ta un spesialista outoproklamá den ayurveda i pues tin interes pa ayurveda ta representá den e pakete di kuido. Esaki no ta un kaso di konflikto di interes? Na Hulanda, den un kaso komparabel, kasá di Minister di Salubridat Públiko Edith Schippers den gabinete Rutte I i II mester a laga su trabou komo consultant den salubridat.

Riba su mes e ta algu di aploudí ku nos minister di salubridat  ta mira ku mester hasi algu na entre otro e mal nutrishon i manera di biba riba nos isla. Pero na lugá di bai habri un sentro pa medisina alternativo, lo no ta mihó pa duna informashon tokante di nutrishon, kuido di kurpa i moda di biba? Den gobièrnu tin diferente profeshonal ta traha riba e terenonan di salubridat públiko, kuido i edukashon, i no muchu tempu pasá tambe riba e tereno di nutrishon. Lo no ta mihó duna nan espasio i instrumento pa nan por hasi nan trabou debidamente?

Malesanan króniko, manera preshon haltu, diabétis (suku), obesidat i mal sirkulashon di sanger pa motibu di ardu será, ta forma un peso enorme riba e sèn (presupuesto) disponibel pa salubridat. E malesanan aki ta algu ku por remediá si hasi algu na nos forma di biba. Ta masha dudoso ku e meta pa ku e malesanan aki lo keda lográ pa medio di un sentro di bienestar karísimo, den kua tur tipo di método alternativo ta keda usá sin ku tin prueba ku nan ta duna e resultado deseá.

Un manera mas efektivo pa evitá malesa, ta siña e pueblo un manera mas salú di biba, den kua gobièrnu tin un papel di maneho. I mester kuminsá ku esaki na un edat mas yòn posibel. Esaki banda di un maneho pa kombatí pobresa ku ta un nesesidat i implementá un infrastruktura ku ta stimulá mas moveshon den bario.

Pa terminá: salubridat òf salú públiko ta nifiká un sosiedat fasilitá (kreá) pa un gobièrnu den kua tur hende por biba salú, i no e kreashon di un sentro di salú “Wellness” den kua ta siña e individuo kon pa adaptá na un sosiedat ku ta frakasando pa loke ta trata salubridat físiko i mental.

Skèpsis

...Minister Suzy Camelia-Römer i su kasá Carl Camelia, boardmember di e Universidad Maharishi for Latin America & the Caribbean (UMLAC), durante un bishita na UMLAC...