Skoba ku show kultural den Sentro Kultural Kòrsou (CCC) den Emmastad

.....Riba e potrètnan nos por mira diferente di nos hendenan di e diferente skolnan di baile durante di e aktividat di Skoba i tambe algu di e presentashon di e gruponan na Brionplein, dia 2 di yüli último...

WILLEMSTAD.- For di aña 2011 e Asosiashon Skolnan di Baile di Kòrsou abreviá komo Skoba ta aktivo pa asina rebibá, reskatá i promové nos bailenan. Tur e 9  skolnan di baile na Kòrsou  ta forma parti di Skoba huntu ku algun grupo di baile tambe.

Realisando kon bunita nos bailenan ta, Skoba ta hasi tur su esfuerso pa mas hende haña interes pa nos bailenan krioyo i asina pone ku e parti aki di nos kultura no ta bai pèrdí. Dor ku e skolnan di baile a uni den Skoba esaki a bira un plataforma ideal pa aserká ora tin e nesesidat pa shownan grandi.

Un ehèmpel ta dia 2 di yüli último ku Skoba su miembronan tabatin e privilegio di baila i duna un tremendo show riba Brionplein na okashon di dia di bandera i entrega di Krus di Mérito. Den e kuadro aki djadumingu awor dia 24 di sèptèmber, Skoba ta bai organisá den CCC un grandioso show di baile na kual tur e skolnan di baile ta bai partisipá.

E dia aki lo ta un dia ku ta kuminsá for di 11 ‘or di mainta i lo kaba te lat di anochi. E no ta bai bira un kompetensia entre e gruponan pero mas bien un presentashon di nos bailenan dor di  16  grupo di baile. Kada grupo ta presentá un baile i despues di pouze nan ta bolbe presentá un otro  baile.

Lo tin   animashon di Fuerza Dos, ka’i òrgel Zulia di Djul  i  DJ Whyty. Klaro ku riba e dia aki nos kosnan krioyo no ta hasi falta i por haña tur tipo di kosnan di boka dushi i nos kuminda típiko. Lo ta un dia ku bo por bini ku henter famia i pasa sigur un ratu masha ameno.

Entrada lo ta un sonrisa grandi i ku esaki Skoba ta spera di trese nos músika un tiki mas serka di nos pueblo. Nos bailenan ta bunita i nos mester realisá ku esakinan ta parti di nos patrimonio nashonal ku nos mester konservá i e úniko manera pa hasi esaki ta dor di duna hopi publisidat na lokual ta di nos.

Tur hende ta bon bini djadumingu awor dia 24 di sèptèmber.  Na mes momento esaki ta un bunita komienso di nos siman di kultura ku ta kuminsá djadumingu awor i ta terminá klousura dia 1 di òktober. Skoba ta orguyoso di por duna su granito na esaki.

No laga e oportunidat aki di bin gosa lokual ta di nos pasa bo vorbei. Si ta deseá mas informashon por tuma kontakto ku Jertiza Vivas na telefòn 521-5255

(Skibi  pa Anthony Haile)

SHARE

LEAVE A REPLY