WILLEMSTAD.- Tin un skol ku djabièrnè awor lo partisipá den parada di Teener ku un tema kontroversial. E tema ta kontroversial, pasombra ta trata di eskuadron ku algun figura kriminal den dje. E tema di e eskuadron kriminal aki ta un pelíkula resien i loke nos por a mira ta ku hopi violensia ta keda usa.

E pelíkula ta bai tokante di un grupo di asesino, un eskuadron, ku un organisashon di gobièrnu ta drenta un dil ku nan, ku nan tin di bai bringa pa haña nan libertat.

E figuranan den e eskuadron trata di un maton pagá, tin un mucha muher ku tabata sikiatra ku ta namorá di un joker mal hende, kende ta bira un mucha muhé sadista, sin eskrupulo, mal hende. Nan mester bringa kontra un grupo atrobe di mal hende pa skapa mundu di apokalipto.

Naturalmente ora mira e figuranan i  sa kiko nan tin di bai hasi, no ta nada humorístiko, pero ta tiramentu di hende mata tin i eksponementu di hopi sanger.

EXTRA no por imaginá ki argumento e skol aki por a usa pa bisti na e tema aki, pero tòg mester tene bon na kuenta kiko ta bisti, spesialmente tinernan. Ta bon pa kabes dje skol i dosentenan paga bon tinu ta kiko ta bisti e muchanan na dje i bai marcha kuné den kaya. E nòmber dje pelíkula so ta bisa tur kos.