WILLEMSTAD.- Skolnan na Kòrsou lo bai ta será próksimamente, ku eksepshon di klasnan ku ta den e periodo di eksámen. Esei por a komprondé for di deklarashon di Minister di Enseñansa sr. Steven Croes ayera nochi. Segun e mandatario, e último dianan el a hiba kòmbersashon ku tur aktor den e sektor di enseñansa pa asina por a yega na desishonnan balansá. Den e trayekto aki el a deliberá ku tur direktiva di skol, ku sindikato Sitek i otronan den enseñansa i tambe e Tim di Krísis pa finalmente por yega na un bon desishon.
Segun Minister Croes, pe tabata importante pa e siman aki e studiantenan por a traha nan pruebanan i tambe eksámennan. Ademas den e mesun siman aki dosentenan lo por a prepará nan alumnonan mas mihó ku ta posibel pa si a kaso lo tin eskalashon di e medidanan.
Pero e último dos dianan por a nota ousensia di dosentenan i tambe un kantidat di alumno na skol, esei pa motibu di kebrante di salú pero tambe e miedu ku tin komo konsekuensia di e ola nobo di COVID. I teniendo kuenta ku e situashon ei a tuma desishon pa e siguiente medidanan pa ku sektor di enseñansa:
Entrante djaluna awor dia 29 di mart te ku djárason 31 di mart skol lo ta será pa alumnonan di enseñansa di fundeshi, enseñansa di fundeshi spesial, enseñansa avansá, esun avansá spesial. Fakansi di Pasku di Resurekshon ta di 1e pa 9 di aprel. E promé dia di skol lo ta 12 di aprel, pero promé ku e fecha ei gobièrnu lo informá di e último desaroyonan i ki influensia esaki lo tin riba sektor di enseñansa.
Tur esaki ta ku eksepshon di alumnonan ku ta den klas di eksámen manera VSBO-4, Havo-5, VWO-6. Esnan ku tin di hasi eksámen, ‘herkansing’ òf ku tin di atendé ku proyektonan spesial pa nan profil.
Segun Minister Croes, ku e desishon aki, e eksepshon ku ta hasi pa mayornan por hiba i buska yunan na skol ta keda kanselá. Esei a nifiká ku tur alumno den klas di eksámen, dosentenan i otro personal di skol lo por hasi uso di rutanan pa bai skol, hasiendo uso di nan roster komo prueba.
Pa loke ta skolnan sekundario i enseñansa universitario lo por sigui ku e sistema virtual. Eksamennan práktiko lo por tuma lugá ku presensia di un máksimo di 4 studiante i teniendo kuenta ku reglanan di higiena i distansia sosial. Formashon práktiko den enseñansa sekundario (SBO) ta kontinuá segun palabrashon ku skolnan, e lugá di kore stazje i dunadó di trabou.
Pa loke ta edukashon pre-eskolar, krèsh i ‘naschoolse opvang’ ta keda habrí solamente pa yunan di mayornan ku tin un funshon vital.
Laga un komentario