WILLEMSTAD.- Skolnan aki na Kòrsou lo kuminsá normalmente bèk riba djaweps dia 20 di ougùstùs próksimo. Pues aña eskolar 2020-2021 ta habri di tal manera bèk ku tur mucha lo por akudí na nan skol personalmente. I e klasnan lo ta di e mesun grandura normal manera nos a konosé promé ku e pandemia di COVID-19. Asina e direktor di e Direktorado di Komunikashon i Informashon di Gobièrnu di Kòrsou, sr. Maharo Isenia, a duna di konosé e siman aki.

Segun sr. Isenia, aki na skolnan di Kòrsou no ta eksistí situashonnan di riesgo grandi, esaki ainda ta hopi abou di akuerdo ku ekspertonan riba tereno di salubridat i epidemiologia. No solamente komo pais nos riesgo ta mas abou sino ku nos muchanan no ta forma parti di e grupo  di riesgo haltu tampoko. Esei ta trese kuné ku den klasnan na skol lo no ta nesesario pa krea e distansia entre e muchanan, i nan lo por keda mantené dje grandura regular.

Loke si ta keda konta pa tur skol ta e reglanan di limpiesa na skol, higiena personal. Pues ningun personanan no outorisá no por subi tereno di skol tampoko sin aviso òf outorisashon previo dje kabes di skol. Esei tambe ta keda vigente.

Segun Isenia, si di un banda no ta nesesario pa e muchanan mantené distansia di 2 meter for di otro, di otro banda e personal (adulto) di skol si tin di mantené distansia sosial. Te na ora si tin kontakto mas djaserka, a lo ménos sòru pa atené na e reglanan di higiena personal.

Manera tur hende por kòrda, na inisio dje periodo di COVID-19 na mart te ku siere di aña eskolar, hopi studiante ku tabata dispone di e fasilidatnan rekerí por a sigui lèsnan den forma virtual, online, pues atrabes di videonan via di internet.

Algun siman promé ku fin di aña eskolar 2019-2020, dosentenan na skolnan básiko mes a hasi e preparashonnan i tene e prekoushonnan nesesario pa reanudashon di lèsnan, pero ku klasnan ku bankinan na distansia i kumpliendo ku reglanan di higiena.