WILLEMSTAD.- Stichting Humanitaire Zorg Curacao, Stichting Schoon Milieu op Curacao (SMOC) i 22 siudadano tin basta tempu kaba den korte kontra Refineria Isla (Curacao S.A). Korte a dikta sentensia un bia mas den e kaso aki den kua a karga e fundashonnan i e siudadanonan konserní ku e gastunan di e prosesonan ku a tuma lugá den korte.

Dia 23 di mei 2018 e fundashonnan i siudadanonan a bai korte di apelashon kontra un veredikto anterior di 2 di mei 2018. Ta trata e kaso kaminda e fundashonnan ambiental huntu ku algun siudadano kier a pone preshon riba refineria pa baha e polushon den e barionan pabou di refineria. 13 yüni 2018 e fundashonnan i siudadanonan a pidi korte di apelashon pa revisá e kaso, destruí e veredikto anterior i eksigí di Refineria Isla pa kumpli ku pago di 75 mion pasobra a faya ku e normanan di polushon. Refineria Isla a kontestá tur e argumentunan di e kontra partido indikando ku e puntonan di reklamo di e fundashonnan no ta kuadra ku realidat.

Dia 11 di desèmber 2018 e partidonan a haña tratamentu di e kaso de korte, representá pa nan abogadonan respektivamente Claassens i Braam. Den e kaso aki drs. van Leeuwen di Smoc tambe a hiba palabra.  Den otro veredikto anterior, di 12 yanüari 2010, korte a dikta ku Isla mester tene su mes na normanan stipulá den e rapòrt di 16 di yüni 2008. Mester midi e emishon di gasnan den e area pabou di refineria, na e santana Beth Chaim i besindario a base di indikashonnan di StAB. A pone un dwangsom di 75 mion florin antiano pa kada aña ku Isla faya ku e normanan di polushon.

Den e veredikto nobo, korte ta dikta ku ta destruí e desishon anterior, ta karga e fundashonnan i aliadonan ku e gastunan di e kaso den prome instansia, ta karga e fundashonnan ku e gastunan pa e kaso di apelashon (hoger beroep) I tambe e fundashonnan i aliadonan mester karga e sobra gastunan di e proseso.

Si den 14 dia despues di e veredikto aki no kumpli ku pago ta nifiká ku e interes ta kuminsá konta. Mas detaye den edishon di EXTRA.