WILLEMSTAD.- ‘Pa dos aña largu nos tin un refineria ku no ta den operashon. Si bo ta wak midimentu entre 2011 i 2021 e diferensia ta hopi grandi. Algun aña pasa midimentu a mustra un sifra entre 100 i 200 di ‘zwaveldioxide’ den airu, awor e ta 10.’ Asina Peter van Leeuwen di organisashon pa medio ambiente Schoon Milieu op Curaçao (SMOC) ta bisa.
‘Si hende te ainda ta duda kiko ta e kousa di polushon den nos medio ambiente, awor nos tin e prueba definitivo. Esaki nos ta mira den midimentu di gobièrnu di Kòrsou mes. Isla i BOO a kousa hopi polushon. No tin duda tokante esaki mas.’
Segun Van Leeuwen gobièrnu awor tin ku duna atenshon na e hende ku ta biba serka e refineria i a sufrí hopi pa hopi tempu. ‘’Tin hende ku a fayesé pa motibu di e polushon. Pa nos ta importante ku gobièrnu awor, sin restrikshon, ta skohe pa salubridat di su pueblo. Pa e motibu nos ke klaridat tokante kondishonnan ku gobièrnu ta pone riba mesa durante negoshashon pa un doño nobo.
Segun SMOC, den un mail pa gobièrnu di Kòrsou: ‘No por ta ku nos tin ku kuminsá evakuá nos skolnan atrobe pa motibu di polushon haltu for di refineria. No por ta ku nos lo tin e situashon atrobe ku hende ta bira malu – òf pió: ku hende ta fayesé - dor di refineria i su sentral di energia BOO. Ta importante ku nunka nos bai bèk na e tempunan bergonsoso.’ Pa e motibu SMOC ta enfatisá ku ta importante ku gobièrnu awor ta habrí i duna informashon tokante kondishonnan ku gobièrnu ta imponé pa e doño nobo.’Ku e mail nan ke haña kontesta riba diferente pregunta ku nan tin tokante e proseso pa yega na un doño nobo.
Van Leeuwen: ‘Si mi mag di duna un konseho: Den un komunikado di RdK, ku fecha 20 di yüni, refineria ta bisa ku nan ta den deliberashon ku Caribbean Petroleum Refinery i ku nan ke bai over pa operá riba gas pa asina kumpli ku normanan di medio ambiente. Mi ta apoyá esaki. Pasobra esaki ta un paso importante pa yega na un situashon ku ménos polushon dor di refineria.’
E ta splika ku e desishon pa operá riba gas no ta sufisiente. Mester tin mas medida. ‘I nos ke sa si gobièrnu ta trahando riba esaki. Pa e motibu nos a manda un mail.’

PORTRET Organisashon SMOC a traha e siguiente tabèl ku informashon tokante nivel di polushon di ‘zwaveldioxide’ entre 2011 i 2021 na Beth Chaim i Kas Chikitu. Sifranan a keda publiká dor di gobièrnu di Kòrsou