WILLEMSTAD.-Minister Hensley Koeiman i SG di ministerio SOAW Etienne van der Horst a informa komunidat e status di e programa di yudansa na komunidat despues ku SOAW a tuma over e programa ku Krus Kora tabata manehá. Minister Koeiman a splika ku gobièrnu di Kòrsou, ministerio di Asuntunan Sosial i di Labor a firma un protokòl ku Ulanda pa tuma e programa over. Despues ku finalmente a firma e protokòl a kuminsá ku registrashon di hendenan dia 3 di mei último. Minister di SOAW a bisa ku di  totalidat di hendenan ku tabata haña yudansa di Krus Kora un grupo mas chikitu a registrá pa sigui haña yudansa. Tin hende no a registrá pasobra segun minister Koeiman nan ta konsiente ku nan no tin derecho. Tin otronan ku no tin derecho pero a registrá tòg. Koeiman a enfatisá ku tin regla anto ámtenarnan di SOAW mester tene nan mes na regla. Niun ámtenar no ta bai rechasá petishon djis pa prèt.

E sekretario general di SOAW ku ta Etienne van der Horst na su turno a duna un bista kon e registrashon di parti di SOAW ta tumando lugá. Krus Kora tabata yuda hopi mas ku 500 famia ku pakete di kuminda, i tambe esnan ku no por kushina ta haña kuminda kayente tur dia. Na Krus Kora tabatin riba 11000 hende inskribí di kua ta hende inskribí na Kòrsou i 5000 ta indokumentá. Pa awor aki Ulanda mes lo keda kubri e yudansa na esnan indokumentá i na ougustus próksimo Kòrsou mes mester tuma e programa kompletu.

Di e 6100 hendenan inskribí na Kranshi ku ta kliente di Krus Kora, un grupo di 4376 so a registrá. Di e 4376 a aprobá 1472 kaba, 1437 ta den tratamentu i a desaprobá 1262. Di e grupo di 1262 ku a rechasá 1065 ta hendenan ku tin entrada kaba. Mas detaye den edishon di EXTRA.