WILLEMSTAD.- Ministerio di Desaroyo Sosial, Labor i Bienestar, SOAW a paga 1,5 mion florin kaba na debe di awa i koriente di siudadanonan ku a registrá pa risibí ayudo. Ta trata di total 86 kas di famia ku a yuda. Minister Ruthmilda Larmonie-Cecilia ta bisa ku awor ta bai pa e siguiente fase di atendé ku hendenan ku a registrá via e link di ministerio di SOAW pa risibí ayudo kaminda lo pasa nan alabes den un trayekto di .
Tabata parlamentario pa MFK, Juniel Carolina ku durante di un “vragenuur” a puntra riba posibilidat pa eksonerá debe di siudadanonan ku Aqualectra a deskonektá nan awa. Segun Carolina ta trata di un grupo grandi di siudadano ku tin debenan kuantioso di 30mil florin, 60 mil florin i asta mas tantu. E parlamentario a bisa ku por sigui e bon ehèmpel di minister di Finansa, Javier Silvania ku a duna eksonerashon pa pago di debe di impuesto.
Larmonie-Cecilia den su kontesta a bisa ku un Minister no tin e outoridat pa duna Aqualectra instrukshon pa eksonerá debe di su klientenan. “Mester komprondé ku Aqualectra ta kompania privá i tin un maneho pa garantisá suministro di awa i koriente.”
Tambe e minister ta bisa ku mester paga bon tinu ku no ta haña e kuenta presentá bèk despues ku a duna un persona eksonerashon. Si e minister tin e outoridat pa yuda esnan mas vulnerabel paga nan debe di awa i forma nan pa evitá ku nan ta kai atrobe den problema.”
Pa e motibu aki e minister ta bisa ku su ministerio ta kana e kaminda di konsientisá e hende pa e no bolbe kai den e mesun problema. “Mester krea konsientisashon riba uso di awa i koriente. Pa e motibu aki SOAW ta kana e proseso diferente i ta atendé ku e problemátika den su totalidat.
Larmonie-Cecilia a konfirmá loke Carolina a trese dilanti, esta ku ta mira ku abitantenan tin debenan sumamente haltu di awa. Hopi biaha e hende ta kai den problema ku pago i e debe ta krese pasobra ta kibra e seyo di Aqualectra i ta haña but pa esaki.
