Tin problema struktural pa yena vakaturanan

WILLEMSTAD.- Sifranan for di nos sistema di registrashon di Ministerio di Desaroyo Sosial, Labor i Bienestar (SOAW) ta indiká ku tin problema struktural pa yena vakaturanan den e sektornan di konstrukshon, hospitalidat i otro sektornan. Un di e motibunan importante tras di esaki ta ku despues ku a sera e sentro di formashon FEFFIK, a surgi un skarsedat grandi di personal di fishi lokal. Ademas, hopi persona ta skohe profeshonnan manera spesialista di kuido estétiko i barbero.

Asina minister di SOAW, Charetti America-Francisca, ta deklará. “Tambe tin personanan ta opta pa traha trabou di mantenshon komo empresario independiente, loke ta hasi difísil pa yena vakatura pa trabounan den servisio. Ministerio di SOAW sinembargo a tuma medidanan ku ta enfoká riba solushon inmediato pa e skarsedat grandi di empleo ku tin aktualmente riba merkado laboral, e minister ta sigui bisa.

“Mesora nos mester sigui wak dilanti. Un opstákulo importante den e solushon di skarsedat ta di un banda e desbalanse grandi entre e abilidatnan i disponibilidat di e buskadónan di trabou lokal i di otro banda e demandanan aktual for di nos ekonomia. P’esei, mi tin e ambishon pa desaroyá un maneho konkreto di merkado laboral durante e kuater añanan aki.”

E minister ta bisa di ke enfoká riba kurso i trayektonan di preparashon spesífikamente pa e sektornan ku tin e mayor demanda. Lo krea e plan akí den estrecho kolaborashon ku Ministerionan di Enseñansa i Ekonomia i sektor privá ku lo ser aserká pa organisá kursonan práktiko. “Esaki no ta un tarea fásil, pero mi ta determiná pa huntu ku nos partnernan logra e meta pa mas hende lokal por partisipá na manera sostenibel den nos ekonomia ku ta sigui desaroyá.”

Di e forma aki no solamente ta fortalesé e resistensia ekonómiko di Kòrsou, pero tambe ta yuda  pueblo bira mas outosufisiente i resiliente, e minister ta sigui bisa.

Sektor di turismo, ku ta un di e pilarnan prinsipal ekonómiko ta sigui desaroyá fuertemente. Na 2024 Kòrsou a risibí mas ku 690 mil turista di estadia i segun e proyekshonnan aktual di Ofisina di Turismo i aeropuerto, e kantidat di turista di estadia lo akumulá na 800 mil den 2028. E desaroyo akí ta enserá un demanda grandi pa trabou adishonal.

Segun sifranan di WTTC, UNWTO i Caribbean Tourism Organization tur kamber di hotèl nobo ta generá aproksimadamente 0.5 te 0.7 empleo nobo, miéntras ku e empleo derivá por yega promé 1.5 te 2.5 empleo adishonal pa kada empleo direkto. Solamente den e sektor di hotèl ta spera un ekspanshon di mas ku 5 mil kamber nobo den e próksimo tres añanan. Segun e proporshonnan usual, esaki lo generá alrededor di 3 mil kupo di trabou direkto nobo den hoteleria, horeca i servisionan di fasilidat.

Ademas, alrededor di 5.400 kupo di trabou relashoná i di sosten, manera transporte, suministradónan di kuminda i artíkulonan di limpiesa, empresanan di rekreo, pakusnan, skolnan di sambuyá, konstrukshon i mantenshon, servisionan di IT, logístika i instruktornan di formashon pa e sektor.

Foto:

...Minister Charetti America-Francisca...