WILLEMSTAD.- Bosero di Solidaridat Sindikal Frensley Sillé a splika ku: ‘Ayera nos tabatin reunion di Solidaridat Sindikal, den kual nos a analisá e presentashon di dr. Emsley Tromp di djabièrnè pasa. E presentashon tabata relashoná ku henter e Groeiakkoord, instrukshon for di Ulanda I situashon rònt di isla.’ Segun Sillé e reunion tambe tabata un preparashon pa akshon. ‘Durante e reunion nos a bin ku ideanan kon nos por akshoná. Awe nos lo sinta reuní ku Frente Amplio. Pa nos kuminsá dal e stapnan nesesario.’
Solidaridat Sindikal pa mas ku dos siman ta analisando e situashon aktual pa formulá nan posishon. Esaki relashoná ku instrukshon i e akuerdo di kresementu ku gobièrnu (‘Groeiakkoord’) a firma. Den e kuadro nan a invitá eks-direktor di Banko Sentral di Kòrsou i Sint Maarten Emsley Tromp siman pasá pa duna un presentashon na tur miembronan. Resientemente Solidaridat Sindikal tambe a manda invitashon na partidonan den Parlamento pa deliberá tokante e medidanan ku gobiernu-Rhuggenaath ke tuma. Segun Sillé lider di frakshon di PAR Ana Maria Paulina a tuma kontakto ku Solidaridat Sindikal kaba, pero te ainda no tin fecha pa sinta ku e parlamentarionan.