Trahadónan ta haña indexering, esei ta parti di akuerdo ku gerensia
WILLEMSTAD.-Den un informe minister di finansa i alabes minister di GMN interino sr. Javier Silvania ta indiká a yega na un solushon pa e problema finansiero ku Klínika Capriles ta konfrontando. Konseho di Minister a bai di akuerdo ku un proposishon di minister di finansa kon pa solushoná e situashon di e Klínika. Ta bai duna e Klínika sierto montante na voorschot pero esei ta mará na kondishonnan. Un di e kondishonnan ta ku gerensia mester kumpli ku pago di salario i indexering na su Trahadónan i tambe kumpli ku kompromisonan fiskal. E lucha di trahadonan a yega serka minister!
Silvania ta informa ku Klínika Capriles ta den problema finansiero grandi. Klínika Capriles no ta den kondishon pa kumpli ku tur su obligashonnan finansiero, entre otro, pa motibu di e struktura di tarifa no aktualisá di kuido di salú mental. Na 2021 Outoridat di Kuido di Kòrsou a hasi un investigashon riba e struktura di tarifanan di kuido salú mental di Klínika Capriles. For di e investigashon aki a sali na kla ku e struktura di tarifa aktual, manteniendo gastunan di kuido konstante, lo krea un défisit anual di máksimo 4.7 mion florin. Ta bin aserka ku pa motibu di e problemanan finansiero persistente di Klínika Capriles a surgi un retraso di 2.7 mion florin den mantenshon di e edifisionan, remplaso di e inventarionan kibrá i aktualisashon di e infrastruktura di ICT.
Gobièrnu i Klínika Capriles a yega na un akuerdo di sosten finansiero den forma di un forskòt di 3.9 mion florin. Gobièrnu a pone entre otro e siguiente kondishonnan pa pago di e transhenan di forskòt:
Durante di aña 2023 lo paga tur salario inkluyendo indeksashon.
Durante di 2023 no por para kuido di salú mental.
Durante di aña 2023 ta kumpli ku tur obligashon fiskal.
Mas detaye den edishon di EXTRA.
Laga un komentario