Alcides Cova: Masha bunita ke paga sobra tranche sesantia pero trahadónan kontratista tambe ke biba

WILLEMSTAD.-Alcides Cova presidente di e sindikato SGTK ta pendiente kiko ta bai pasa despues ku Refineria di Kòrsou (RdK) a pone beslag riba produktonan propiedat di Isla/PDVSA aki na Kòrsou. RdK  a bisa ku nan mes ta bai bende e produktonan pa asina saka máksimo ganashi pa generá sufisiente plaka pa asina por paga sobra plaka di sesantia na eks trahadónan di e refineria. Alcides Cova den deklarashon na EXTRA a duna di konosé ku nan a reuní ku e direktor di RdK i otro partidonan pa splika tur hende ku kontratistanan i nan trahadónan tambe ke biba.

E dirigente sindikal ta bisa ku loke ku ta pasando rondó di futuro di refineria ta motibu di preokupashon. SGTK a reuní ku gobièrnu pa buska yudansa pa e trahadónan di kontratista. E trahadó di kontratista no a haña retiro, pero no tin trabou. Pa kolmo te na momentu ku a haña sierto trabounan nan no ta haña pago i esei ta pone ku no por paga nan trahadónan.

Siman pasá a yega asina leu ku porfin trahadónan di kontratista a haña algu di yudansa di parti gobièrnu. Cova ta enfatisá ku e trahadó di kontratista no a haña suma di plaka grandi manera trahadó di Isla. E yudansa ku a pidi a tarda hopi, pero porfin el a yega.

Alcides Cova a splika EXTRA ku nan a papia serio ku RdK, pa ora bende produktonan den tanki pa kòrda ku no por hisa tur e sèn ei i us’e pa paga di 4 i di 5 tranche di plaka na trahadónan Isla so. Kòrda ku kontratistanan i nan trahadónan tambe ke biba. Nan tambe tin derecho di haña pago di nan trabounan desplegá.