WILLEMSTAD.- Kontinuando ku e investigashon alrededor di 6:30 polis a detené e hòmber R.E.E. , nasé na Kòrsou , 39 aña di edat riba seru Fortunaweg komo sospechoso di intento di asesinato den e kaso aki.

Djasabra 3 yüni 2017 alrededor di 9:20 ’or sentral di polis a dirigí un patruya na un toko situa den Zuiderzeestraat pa un kaso kaminda un persona i dos (2) mucha lo a haña kemadura na nan kurpa.
Na e sitio polis a topa un hòmber di 39 aña di edat ku kemadura na gran parti di su kurpa i tambe dos mucha respektivamente 6 i 8 aña ku kemadura na orea i pia.

For di un investigashon preliminar ku polis a realisá na e sitio a resultá ku e víktima di 39 aña tabata para na tonbank den un minimarket i e sospechoso a kana bini serka dje.
Tabatin manera un interkambio di palabra i direpente e sospechoso a saka bòter di plèstik i a basha un líkido riba e víktima i despues a sende na kandela. Tantu e víktima komo e sospechoso a pega kandela. E sospechoso a kita e T-shirt ku e tabatin bisti i a kore sali for di e minimarket miéntras e víktima a keda na kandela. Dos mucha ku tabata den bisindario tambe a haña kemadura respektivamente na orea i na pia.

Personanan den bisindario a logra paga e kandela

riba e víktima.
E hòmber víktima aki di 39 aña a keda transportá ku urgensia ku ambulans pa Poliklínika pa tratamentu médiko. Mas lat a transportá e dos hóbennan tambe pa poliklínika pa atenshon médiko.

EXTRA a komprendé di fuente ofisial ku e mucha ta fo'i peliger, pero e hòmber víktima si su kondishon ta di preokupashon. No ta muchu kla ta kiko a kondusí e hòmber pa kometé un akto asina horibel. Tur kos ta mustra den direkshon ku ta trata di un acto premedita.  E úniko kos ku EXTRA a komprendé ku ta ku esnan envolví den e kaso aki ta bisiña.

Por último ku insistensia ta keda menshoná ku e sospechoso lo ta envolví tambe den e intento pa sende misa di Suffisant na kandela. Pero e último vershon aki no a keda konfirmá pa polis.