WILLEMSTAD.- E akusado V.H.(36), ku a keda apsolvé di tur kulpa pa e kaso di ladronisia den e pakus Uptown den Punda, a bai hasi apelashon di daño perhuisio na Ministerio Públiko.  Esaki despues ku el a keda será inosentemente segun korte di promé instansia.

E akusado a keda detené despues pa e ladronisia,

ku su propio mama a bai polis na promé instante i a bisa di a  rekonos’é su yu riba imágennan di kámara den un grupo  hòrtando den e pakus.

Banda di esaki e  ta keda akusá di a hòrta un vèn bùs di su tata di kriansa.

Tambe e ta keda akusá di a kue un kantidat di paña di markanan renombrá manera Psycho Bunny, Off the Pitch i tambe Cruyff ku ta pertenesé na e pakus. Segun e akusashon, e akusado a hasi esaki huntu ku otronan dor di kore yega na e establesimentu kara tapá, destruí e portanan di glas ku un mukel, pa despues drenta den e pakus kue un kantidat di paña bai kuné.

Riba imágennan di kámara di establesimentu ku a bai viral, por a mira kon e suseso a tuma lugá i tambe vários hòmber kara tapá ku a kometé e akto.

Mas aleu e ta keda akusá pa poseshon di arma di kandela i bala.

Segun e prosèsverbal mama di e akusado mes a bai polis ora el a mira e imágennan di kámara ku a bai viral. E  mama a bisa ku el a rekonosé su yu na su kabeinan di dred, e kamisa manga largu ku e akusado tabatin bistí, su postura i tambe su kaná.

Pero despues di dos siman e mama a bai bèk polis i bisa ku e loke el a deklará no ta kuadra.

Segun e señora, e dia ei el a bebe remedi i tabata mira poko wazig. Despues el a realisá ku e hende ku el a mira riba imágennan no tabata su yu.

V.H. ku tabata e úniko será den e kaso aki, a bisa durante tratamentu di e kaso, ku su mama a ekiboká i ku no ta kuadra  ku e tabata den e grupo hòrtando den e pakus. El a splika ku enbèrdat el  a ofresé su mes pa para shofùr di e vèn  ku a keda hòrtá den Brievengat, pero despues ku el a tende kiko e plan ta bai bira, e no a partisipá mas.

El a koperá ku e investigashon i apesar di esaki su so a kai será. Segun V.H. mas aleu, nan  a kima su tres outonan ora ku e tabata será komo atvertensia pa e no papia bisa ta ken e kulpabelnan nan ta. Su frei a keda menasá dos bia ku arma di kandela i p’esei e ta evitá di divulgá nòmber.

Durante entrada hudisial, a haña vários kosnan hòrtá den e vèn i tambe na su kas.

El a bisa ku ta riba imágennan di kámara e mes a mira e vèn i a rabia ku nan a hòrta e vèn di trabou di su tata.  E ta kere esnan ku a hòrta e pañanan a skonde algun kos den e vèn.

Su abogado mr Zahedi a pidi pa suspend’é su detenshon. E abogado a trese vários punto fuerte  durante tratamentu di e kaso. Su abogado a splika ku no por prueba ku ta su kliente tabata involukrá den e robo.  E abogado a bisa ku e dia ei su mama tabata malu i bou di emoshon a mira robes, pero ora el a realisá el a bai polis mesora i aklará esaki.

E akusado mes a bisa ku e no tin pakiko di kometé niun robo, pasó e ta traha i semper si e mester di algu su mayornan ta dun’é.

Fiskal a haña e akusashon probá i a hasi demanda di 3 aña di kastigu  pa e akusado. Wes a bai di akuerdo ku e defensa i ta apsolv’é e akusado di tur kulpa. Segun wes e pruebanan ta insufisiente i no por proba den niun ángulo ku e akusado tabata involukrá den e kaso. Su mama ta un persona ku ta bisti brel i kisas enbèrdat bou di emoshon el a ekibuká su mes ora el a mira e imágennan di e robo i kere ku su yu tabata involukrá. Esaki tabata motibu ku V.H. a hasi demanda kontra OM pa daño perhuisio di tur e dia nan ku el a sinta pòrnada.