WILLEMSTAD.- Despues di algu mas ku dos aña outoridatnan a realisá un detenshon den kaso di e dòbel asesinato ku a tuma lugá na aprel di aña 2018 kual a kosta bida di e shofùr Micheal Clement Mercera nasé na Kòrsou, 23 novèmber 1972 i e okupante, e hòmber Jurensly Isebio Martina nasé na Kòrsou, 4 di ougùstùs 1984.

Kontinuando ku investigashon relashoná ku e kaso di asesinato ku a tuma lugá lugá 8 di aprel 2018 na Helfrichdorp, polis a detené un hòmber sospechoso.

Djasabra alrededor di dies pasá di nuebe di anochi, tim di aresto a detené riba Brionplein e hòmber D.R.M. nasé na Kòrsou di 34 aña di edat, relashoná ku e asesinato ariba menshoná. Seguidamente despues di e aresto e tim investigadó di kaso di homisidio konhuntamente ku tim di aresto a tene entrada hudisial na un kas na Kaya Santimac i a haña i konfiská artíkulonan ku ta di importansia pe investigashon.

8 aprel 2018

Riba e dia en kuestion alrededor di bintisinku pa diesdos di anochi, polis a bai Helfrichdorp pa un aksidente di tráfiko. Einan a topa un vehíkulo ku a dal den un palu di indju i ku tin dos hòmber heridá den e vehíkulo.

Tur kos tabata indiká ku e shofùr lo a pèrdè kontròl riba stür, dal kontra bòrchi di tráfiko, baha for di kaminda dal den un palu di lus pa despues bai dal den un palu di indju.  Dor di e impakto aki e shofùr a keda pegá den e vehíkulo i e okupante a risibí leshon na su nèk. Durante investigashon na e outo, polis a topa perforashon di bala. Te kaminda esaki tabata posibel i bou di e sirkunstansianan presente, por a mira ku e shofùr tabatin herida di bala na su skouder banda robes.

Testigunan a indiká ku tur kos a kuminsá despues di un diskushon ku tabatin entre e víktimanan i un sospechoso na un minimarket den serkania. Despues di e diskushon, e hòmber sospechoso a bai pero a regresá den e área riba velosidat hopi haltu nèt na momentu ku e vehíkulo di e víktimanan tambe a bandoná e sitio. E momentu ei e testigunan a tende zonidonan di tiru siguí pa un sla fuerte.

Djis despues a mira huma bai laira kaminda e víktimanan a resultá den un palu di mansaliña. Polis a buska pero manera tur hende sa, e man di hustisia ta largu i ta yega te kaminda bo ta. I djasabra a pone man riba e sospechoso D.R.M. A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.