WILLEMSTAD.- Resientemente korte di promé instansia a bai di akuerdo pa posponé kaso di 14990 gram di koka mas 13830 gram di mariwana, tambe poseshon di 3 arma kandela i bala, ku polis a deskubrí den un apartamento na Rancho dia 29 di febrüari último.

Ministerio Públiko ta akusá e yu’i Kòrsou A.Alders (30), A. Pirela Gonzales (35) nase na Venezuela i e akusado femenino L. Romero tambe nase na Venezuela responsabel pa e merkansia menshoná.

E kaso a keda posponé pa motibu ku abogado di Pirela Gonzales ta den karentena. E otro abogadonan a pidi pa splet e kaso i sigui ku e tratamentu di esnan ku si nan abogado tabata presente, pero fiskal Bos a bisa ku e ta preferá di trata e kaso ku tur e akusadonan presente, i hues a bai di akuerdo. Mirando esaki e kaso a keda posponé pa dia 13 di yanüari binidero.

E akusado Pirela Gonzales a lanta para i meskos ku den e kasonan di pro forma anterior, a pidi hues pa laga e akusado femenino L. Romero bai kas. El a bisa ku e no tin nada di aber ku e droga. E tabata serka dje komo dama di kompania i no tabata sa ku tin droga den e kas. Úniko kos el a mir’e bin ku arma, pero e arma tabata di un amigu ku mester a bin tum’e serka dje. Hues na su turno a bisa Pirela Gonzales ku su abogado no tei i no ta responsabel pa e deklará sin presensia di su defensa. E akusado a bisa ku e ke papia paso e no ta haña ku L. Romero mester ta será den e kaso aki paso e ta inosente.

Abogado Vaders ku tin defensa di Alders, a pidi korte pa suspendé detenshon di su kliente inmediato. E abogado a splika ku su kliente tin 10 luna será sin e kaso keda tratá. Pa lei esaki ta dune e derechi pa haña su libertat inmediato, segun e abogado.

Mas aleu e abogado a bisa ku no tin prueba konkreto ku Alders tin di aber ku e merkansia ku a haña den e departamento. Solamente algun kòmbersashonnan di tap, ku no por proba ku ta trata di droga.

Mas aleu e abogado a bisa ku Alders su pareha i su yu ta dependé kompletamente di dje i esei ta pone ku su situashon personal ta pisa mas ku e akusashonnan.

Abogado Lie Atjam ku tin e defensa di Romero, a pidi hues pa suspendé detenshon di su kliente. Segun e abogado, su kliente no por para responsabel pa algu ku e no sa di dje.

E tin 10 luna será inhustamente. El a pidi pa suspendé su detenshon bou di kondishonnan manera entrega di su pasport, number di telefòn ku por hañ’e i tambe adrès di e sitio ku e lo bai hospedá.

Fiskal Bos a pidi pa rechasá tur e petishonnan pa suspendé detenshon di e akusadonan. Fiskal a bisa ku durante un kombersashon di tap, polis a skucha kon Alders lo tabata negoshá ku deskonosínan i bisa entre otro ku e tin e Snow i tambe ku el a brua algu den dje. Polis a konkluí ku e kombersashonnan tabata bai tokante benta di droga.  Segun fiskal, den un di e kombersashonnan por a skucha ku e akusadonan tabata papia ku deskonosínan ofresiendo nan pakete di yerba na bon preis.

Pa loke ta trata e akusado femenino, fiskal a bisa ku e tabata den e kamber kaminda  e droga i arma nan tabata. Esei ta hasié kómplise di e kaso pa motibu ku e tabata na altura di e kargamentu. Segun fiskal e rísiko pa e hui bai fo’i nos pais, ta hopi grandi mirando ku e ta ilegal riba nos isla.

E akusado femenino den su último palabra a bisa ku el a bin fo’i Venezuela komo dama di kompania serka Pirela Gonzales i tambe pa hasi sex kontra pago, asina haña sèn pa  e manda pa su famia. El a bisa ku el a mira Pirela bin ku saku, pero el a bai pone nan den un otro kamber i no kaminda e tabata drumi. Úniko kos ku el a mira tabata un arma di kandela ku Pirela tabatin den su man i el a puntr’e pa kiko e tin e arma i Pirela a bis’e ta di un amigu ku mester bin busk’e. Segun e dama na polis el a deklará e bèrdat manera nan a pidié. El a hura ku e lo no bandoná Kòrsou promé ku e kaso keda trata i ta dispuesto pa entrega su pasport. Tampoko e lo no riska su bida hui bai den un lancha. E tin su úniko yu hòmber na Venezuela ku ta tur kos pe.

Pa loke ta trata Pirela  den su último palabra, el a bisa ku e ta inosente i dia e kaso keda tratá, korte mes lo bai mira esaki ora tur kos sali na klá. El a pidi pa liberá tantu Alders komo Romero.

Alders a bisa ku e ta kompletamente inosente i ku e ke bai kas serka su famia ku mester di dje.

Hues Verbeek despues di a bai deliberá a bisa ku tur 3 akusado tabatin un ròl den e kaso aki. Romero tabata esun ku lo mester a wak e merkansia, Pirela Gonzales esun ku lo a hasi e importashon i Alders esun ku lo tabata distribuí e merkansia riba kaya. Al final hues a bai di akuerdo pa suspendé detenshon di Romero bou di e kondishon. Hues a bis’e ku e no presentá lo manda busk’e i si e wòrdu haña kulpabel e lo bolbe kai será.

Pa loke ta trata Pirela i Alders, hues a bai di akuerdo ku e akusashonnan ainda ta grave i tin indikashonnan fuerte ku nan lo ta envolví.  Mirando tur esakinan hues ta rechasá e petishon pa suspendé nan detenshon. E kaso lo keda trata dia 13 di yanüari binidero.