WILLEMSTAD.-Outoridatnan polisial a hasi detenshon di e hòmber G.F resientemente. Ta trata di un hòmber sospechoso den un kaso kriminal hopi serio na Ulanda. Polisnan na Kòrsou a detené F riba petishon di outoridatnan ulandes. F lo tin kontakto estrecho ku Ridouan Tahgi kende ta keda akusá di trafikashon di droga na nivel internashonal, asina e korant regional AD ta informá. Outoridatnan ulandes ta spera ku pronto lo manda F Ulanda.

A detené G.F na un hotèl na Jan Thiel relashona ku kaso grandi di droga. Hustisia tin prueba ku F tabatin kontakto ku Tahgi na 2015 relashoná ku kaso grandi kaminda a konfiská lote di arma na Nieuwegein. Tambe nan tin prueba ku Taghi i F ta manda mensahe pa otro despues di morto di e hòmber Ronald Bakker dia 9 di sèptèmber 2015. Tur e informashon adishonal aki a keda añadí na e kaso Marengo.

Ta sospecha ku F lo ta esun embolbí den trafikashon di droga na gran eskala, e.o ku F lo ta esun enkargá pa manda lotenan grandi di kokaina rumbo pa Oropa.

Informashon ta indiká ku F a figura tambe den e kaso Carneool den kua un mucha di apénas 12 aña a pèrdè su bida na man di kriminalnan. Segun informashonnan, e tata di e mucha hòmber lo tabata embolbí ku un lote di kokaina ku a ‘pèrdè’ i asina a hañ’e den konflikto ku kriminalnan di Amsterdam.  A pasa basha bala riba e vehíkulo kaminda e hóben tabata biba ku su mayornan i el a resultá herida.

E mesun F aki lo mester ta e persona ku drecha telefònnan pa kriminalnan hasi uso di dje. Entretantu a detené i sentensia e doño di e kompania di telefòn na un kastigu di 4.5 aña di prizòn.