WILLEMSTAD. - Akusadonan metí ku kaso asesinato “The Alley”, esta e hóben femenino Romainy Confesor, i e hóben maskulino Dudmar Lindeborg, tur dos nan abogadonan tabatin puntonan trese dilanti pa nan por rekobrá nan libertat.

Abogado mr. Eldon “Peppie” Sulvaran ku tin e defensa di Dhanursho Frans na su enkargo no a ni presentá den sala di korte, pa motibu ku e ta di opinion ku te na ora e pidi pa pone su kliente den libertat, di antemano e sa kaba ku e fli ei no ta bai subi.

Pues el a notifiká su kliente i e no a presentá. Un di e aspektonan ku a bin dilanti den e kaso di e akusado femenino, ta ku su kondishon di salú no ta di tal forma ku e por sigui pasa su dianan den prizòn. Fiskal a duna di konosé ku dia 18 di novèmber Korte Superior a rechasá un petishon ku e akusado aki a hasi, bou di e preteksto ku e ta malu. E dia ei HOF no a mira nada malu ku por kondusí na su libertat.

Den sala di korte e abogado a pleita riba skol di e akusado. E ta un di e muchanan di mas sabí den kurá di skol i e suseso aki a pone ku e ta pèrdiendo e aña eskolar aki, loke ku lo perhudik’é. E abogado ta bisa ku sigui tene e hóben aki será, pa algu ku e no a hasi nada, poniendo su futuro na peliger, ta unu di lamentá. Esei tabata e kaso tambe di e akusado Dudmar ku su abogado tambe ta di opinion ku su trabou ta pendiente su regreso, pero si e tarda, tin indikashon ku e lo pèrdè trabou. No mester laga e situashon yega dje leu ei, segun e abogado. Ku aresto di e di kuater akusado, ta parse ku no tin kolushon mas, pero dia ku hues a tuma e desishon pa no laga niun hende bai kas te dia ku a arestá e di kuater akusado. E dos akusadonan aki mester keda será te 12 di mei.