WILLEMSTAD.- Kiko tabata motibu ku mester a asesiná rèper Boechi (Ruchendell Windster). Esei tabata e promé palabranan di e kasá di Boechi den entrevista hopi emoshonal riba Omroep Brabant.

Dia 9 di desèmber, kasi 12 or di anochi Boechi ta keda asesiná riba Rooseveltweg. Un outo a pasa i okupante di e outo a basha bala riba e rèper, ku a fayesé na e sitio mes.

Su kasá Niandy Windster-Losiabaar ta konta den e entrevista, ku 15 minüt promé ku e asesinato, su kasá a mand’é un app bisando ku e ta bai buska kuminda i despues bai kas. E dia ei, Niandy tabata na estado i e notisia aki tabatin un impakto fuerte riba dje.

A transportá e kurpa di Boechi pa Ulanda kaminda e entiero a tuma lugá. Tabatin momentu di despedida na Tilburg ku a  bai kompleto for di man. Riba e mesun anochi tabatin un asesinato na un pòmp di gasolin di kual e sospechoso i víktima e dia ei tambe tabata na e despedida di Boechi. E kasá sinembargo no ta kere ku e kaso aki tin nada di aber ku su kasá Boechi.

Na momentu di e entiero tambe kosnan a bai for di man te e kasá mester a pidi pa presensia di polis. I tur esaki a laga basta gastu atras pa e famia, den e kaso aki pa e kasá. Hendenan a shusha den bisindario i tambe a kousa daño na e graf di Boechi. Tur esaki a trese e gastunan mas i mas haltu, miéntras ku Boechi no tabatin seguro pa kubri esakinan. Gran parti di e sènnan rekoudá a bai pa kubri gastunan miéntras ku a keda mas debe ku ta Niandy Windster tin di kubri.

Asesinato di Boechi tabata algu inesperá; Niandy sa sigur ku su kasá no ta den e tipo di kosnan aki. E stima su famia i nunka lo hinka nan den peliger.

Remarkabel i espantoso den e kaso aki ta ku a detené dos sospechoso di kual un di nan ta famia mes di Boechi. Pero dikon, kiko a pone ku un famia mes ta kita bida di Boechi ta pregunta ku e kasá ta laga atras den e entrevista. Tabata straño, pasobra tabata famia pero tòg a tir’é mata pasobra e tiradó ta e famia.

Niandy Windster a bisa ku ni maske kiko sali komo motibu di e kaso aki, e ta mentalmente prepará pe. E ta keda kòrda su kasá i tata di su yunan komo un hòmber lif pa nan tur.

Por mira e entrevista ku Niandy Windster-Losiabaar tambe riba EXTRA su plataforma digital.

Detenshon

Manera ta konosí, dia 7 di aprel a detené e hòmber C.C., na Ulanda i dia 26 di aprel polis a detené un di dos sospechoso den e kaso aki, ta trata di e hòmber C.H.E.X., di 24 aña.

Miéntras tantu korte di Hustisia a pone riba ròl pa 30 di yüni 2023 tratamentu ‘pro forma’ di e kaso di asesinato di rèper Boechi. E kaso ta konosí bou di nòmber ‘Hummer’. Riba 30 di yüni lo pone fecha pa tratamentu di e kaso kompletu despues.