WILLEMSTAD.- Tur e kuater sospechosonan den e kaso di supuesto soborno na Refineria di Kòrsou, konosí komo kaso “Lacerta”, a rekobrá nan libertat ayera. Esei EXTRA por a komprondé. T’asina ku e grupo aki a inkluí èks direktor di e kompania sr. R. van Kwartel i e tambe a ser poné den libertat kondishonal. E grupo ta konsistí tambe di e akusadonan Michelle Kinburn, Ashley Isidora, i Gilbert Cijntje.

E vosero di Ministerio Públiko sr. Roderick Gouverneur a duna di konosé na prensa ku nan status lo keda esun di sospechoso ya ku e investigashonnan no a konkluí ainda. Nan tur ta sospechoso den kaso di soborno en buska di un operador nobo pa Refineria Isla.

Na su salida sr. Van Kwartel a duna di konosé ku e lo no tin ningun komentario. E sospechoso a ser risibí dor di su famianan ku a presentá ku flor i a dun’é tur klase di sosten moral.

Sr. Gouverneur a konfirmá ku hues komisario a laga e grupo di kuater aki bai den libertat pero ku un kantidat di kondishon mará na dje. Un dje kondishonnan ta ku nan lo mester keda disponibel si hustisia mester di nan; nan mester a entregá nan pasport pa asina evitá ku nan lo por bandoná pais. Pero e investigashon ta kontinuá normalmente i ku e mira ku e kaso lo ser presentá den korte mas pronto ku ta posibel pa nan duna kuenta i rason i pa por haña klaridat tambe di loke a sosodé.

Van Kwartel i Isidora a keda detené dia 24 di yüni i tres dia despues a detené Kinburn i Cijntje.

Hunta di Komisario di RdK huntu ku gobièrnu di Kòrsou a hasi denunsia di posibel echonan kastigabel.

E sospecho den e kaso aki ta ku e sospechosonan detené a hasi nan mes kulpabel dor di pidi un suma grandi bou di mesa pa privilegiá un dje partnernan ku tabata interesá pa operá refineria na yanüari 2020.

E kuater sospechosonan tabata kana un trayekto paralelo ku a kondusí na intentonan konkreto pa nan haña plaka ora sera akuerdo ku esun ku lo bira e partner stratégiko pa operá Refineria. Ta papia di un suma di 750 mil dòler ku mester a paga e kuater sospechosonan mesora ora a firma e Memorandum òf Understanding ku RdK i otro komishonnan pa e suma di 20 mil dòler pa luna.