Willemstad.- Pa loke ta trata e investigashon ‘Tres Belle’ ku ta dirigí riba trafikashon i kontrabanda di hende na e Bar Hot Chicks, algun siman pasá a skòrs tur sospechoso for di detenshon preventivo. Esaki riba desishon di wes komisario. Ministerio Públiko (OM) no tabata di akuerdo pa loke ta trata 3 di e 5 sospechosonan i a bai den apelashon kontra di e desishon di wes komisario.

OM a trese entre otro dilanti ku mester ta bon kla ku trafikashon di hende ta un echo kastigabel serio, i ku e tipo di kriminalidat aki ta wòrdu atendé ku tur kapasidat ku tin disponibel. Pa e motibu aki no ta kuadra pa laga e sospechosonan bai liber demasiado lihé. Esaki ta hasi e proseso pa atendé ku trafikashon di hende aun mas difisil.

Riba e punto aki, Korte tabata di akuerdo ku OM. Korte a disidi ku e 2 sospechosonan prinsipal den e investigashon ‘Tres Belle’ lo bai bèk den detenshon. E sobra sospechosonan por warda restu di e investigashon den libertad mirando nan ròl menos prominente den e kaso. Riba termino kortiku lo ehekutá e desishon pa enkarselá e dos sospechosonan prinsipal atrobe.