WILLEMSTAD - E sosten struktural di Defensa na Wardakosta ku a dura un periodo largu,  ofisialmente ta terminá awe. Ta trata di e refuerso di Personal di Defensa duná na e ekiponan di patruya marítimo di Wardakosta. For di zomer di 2019 Milisianonan di Kòrsou i Aruba a nabegá huntu riba Metal Sharks di Wardakosta. Wardakosta ku esaki durante e periodo ku ta tras di lomba por a garantisá su kapasidat di patruya marítimo.

Wardakosta di Region Karibe ta responsabel ku su unidatnan marítimo i di buelo pa kòntròl di fronteranan marítimo. Tambe nan ta ehersé operashonnan (search and rescue) di búskeda i reskate, i Wardakosta ta mantené legislashon riba laman. Pa por a hasi esaki na un forma efikas durante último añanan, Wardakosta a hasi un petishon na Defensa pa sosten. Defensa a hasi esaki ku esfuerso di Milisia di Kòrsou i Aruba (CURMIL en ARUMIL). Tambe nan a risibí entrenamentu pa sertifikashon komo BAVPOL – Funshonario di Polis Ekstraordinario.

Último periodo tras di lomba Wardakosta a hasi un invershon kuantioso den su kapasidat di kapasitashon. Ku e refuerso di hopi empleado nobo, e nesesidat pa sosten struktural di parti di Defensa a bira ménos. Ta pa e motibu ei e sosten ei ta terminá awor.

Koperashon struktural

Ounke ku e esfuerso di CURMIL i ARUMIL riba Metal Sharks  ta terminá, hopi otro trabou di koperashon entre Defensa i Wardakosta ta sigui. Ámbos organisashon ta traha estrechamente huntu riba tereno di bibienda, ICT, mantenshon i kompra di material i servisio. Defensa i Wardakosta ta keda pone nan mes disponibel konhuntamente pa seguridat marítimo.