WILLEMSTAD.- E spesialista médiko Merikano di 57 aña inisialnan D.S.P., ku a bin Kòrsou spesialmente pa yuda den e krísis di Covid-19 na Curaçao Medical Center (CMC) i ku a keda detené djaluna último, a wòrdu pone den libertat ayera.
Su abogado mr Martha a logra konvensé hues komisario ku algun punto fuerte ku el a trese dilanti, di kual e abogado a haña rason. Hues a bai di akuerdo pa poné den libertat bou di vários kondishon entre otro entrega di su pasport, pendiente mas investigashon.
E aresto tabata resultado di un investigashon relashoná ku ladronisia di un kantidat di ampoya basta karu ku a keda hòrtá for di sala di operashon di un hospital. E spesialista a wòrdu arestá dor di reshèrshinan di VVC.
Durante investigashon na su kamber di Renaissance hotèl polis a haña i konfiská algun di e ampoyanan ku ya a keda usá.
Gerensia di CMC a informá ku djaluna 17 di ougùstùs a konstatá un kaso di ladronisia interno na CMC. Personal di Seguridat a konfrontá e dòkter Merikano ku esaki, despues ku nan a pasa dor di imágen di kámara, i e persona a konfesá ku e la hòrta sierto artíkulo ku ta propiedat di CMC.
Miéntras tantu gerensia di CMC a hasi un denunsia di ladronisia na polis. Gerensia di CMC ke enfatisá ku e regla di sero-toleransia ta na vigor na hòspital, kual ta nifiká ku lo no tolerá ningun forma di ladronisia.
Minister interino di Salubridat, Zita Jesus-Leito a bisa ku e situashon ta hopi laf i lamentabel.
Pues ayera e merikano por a bai kas, pero su pasport a keda konfiská miéntras ku e investigashon ta kontinuá.