WILLEMSTAD.- Segun Asosashon di spesialistanan di Kòrsou (VMSC) trahadónan di sala di operashon na Sehos a mustra hopi kurashi den e kaso ku siruhano Misset. Segun VMSC nan a pidi atenshon pa nan preokupashon pa e siruhano general. Personal a deklará ku nan no tabatin konfiansa mas den e spesialista. Den un komunikado ku VMSC a manda ayera, nan ta menshoná ku e personal na promé instansia a mèldu nan preokupashon na Konseho di Direktiva di Sehos, ‘pero aparentemente nan no a sigui sufisiente riba esaki’. Parlamentario Giselle Mc Willam (MAN) na nòmber di e personal di sala di operashon públikamente a puntra atenshon pa e situashon.

Asosashon di spesialistanan ta kompletamente di akuerdo ku e manera ku Mc William a tuma e kaso na serio i a buska pa un solushon. E asosashon ta di opinion ku e situashon a keda kreá pasobra ni Konseho di Direktiva di Sehos, ni e spesialistanan médiko, ni gobièrnu a tuma responsabilidat pa realmente pone seguridat di e pashènt komo punto di salida. Awor e asosashon ta pidi pa un investigashon independiente i transparente na e situashon ku siruhano Misset.

Na opinion di asosashon e manera ku inspektor-general Jan Huurman na e momentu aki ta trata e kaso no ta korekto. Ta parse ku Huurman tin hopi purá pa finalisá e investigashon. I segun e asosashon esaki ta kompletamente kontra tur reglanan di étika. Segun asosashon mester bin un evaluashon independiente, ophetivo  i transparente. Segun VMSC si esaki no ta tuma lugá, pueblo nunka por tin konfiansa mas den e siruhano.

VMSC ta splika ku Huurman mes sa ku e tin ku traha segun reglanan ophetivo, pero ta parse ku deliberadamente e ke krea konfushon.