Dia gobièrnu paga bèk na tempu lo no pidi ‘voorschot’

WILLEMSTAD.- Si Ontvanger, Alfonso Trona tin ku bai anto minister di Finansa, Javier Silvania tambe tin ku bai. Asina kolaboradó di frakshon di partido Man, Eugene Cleopa ta konkluí despues di a tuma nota di e “roadshow” di Silvania a base di un rapòrt di SOAB riba entre otro pago di restitushon.

Cleopa ta puntra su mes ta kiko ta pasando pasobra. “Si kompará 3 miar florin ku Silvania a duna na eksonerashon di debe di impuesto i e 5 mion florin ku Ontvanger a paga den 5 aña komo “voorschot” riba restitushon, mi no ta komprondé dikon ta yag riba Trona miéntras e minister ta pretendé di por sali liber.”

Cleopa ta mustra ku parlamento a puntra Silvania pa e base legal di su desishon pa duna 3 miar na eksonerashon di debe di impuesto, pero te awe e minister no por presentá den parlamento ku un splikashon”, Cleopa ta bisa. “Si no tin lei òf regla eksonerá 3 mion na debe di impuesto no por tin lei òf regla tampoko pa duna ‘voorshot’ riba restitushon.”

Na opinion di e kolaboradó di frakshon di MAN Silvania ainda ta yag riba Trona i direktor di servisio di impuesto Jamila Isenia manera el a kuminsá hasi na inisio di su periodo komo minister. “Den pasado tambe Silvania a hasi esaki i den koalishon a bis’é pa hala atras, pero aparentemente e no ta tende i a haña un otro forma pa yag tras di e hendenan.”

E otro manera ku Cleopa ta referí na dje ta di manda SOAB ku un instrukshon dirigí pa asina e logra tòg loke tin gana di hasi. “SOAB ta Silvania su ko’i hunga kuné. Ta p’esei e ta duna e ofisina di akountent mas tantu supsidio ku kualke otro instansia supsidiá pa gobièrnu.”

Cleopa ta di opinion ku Ontvanger ta hibando un maneho sosial/humano i no ta kore manda deurwaarder ku batayon di polis riba hende. “Mi ta haña ku parlamento mester yama un reunion i invitá Trona pa e bin splika su maneho ku e ta hibando.”

MANEHO

Pago di restitushon i posibel “voorschot” riba e restitushon ta un maneho ku Ontvanger mes ta hiba na su diskreshon. Segun Cleopa despues di e kandela den edifisio di Ontvanger a surgi retraso den pago di restitushon i mas persona/instansia a hasi apelashon pa haña un “voorschot” i ta for di un punto di bista sosial/humano ku Ontvanger a disidí di paga esakinan pendiente un desishon final riba e restitushon.”

“Den kaso ku paga di mas lo kita esaki atrobe den futuro ora di paga restitushon riba e siguiente aña.” Pago di “voorschot” riba restitushon ta algu ku sinembargo ta kuminsá serka gobièrnu mes pasobra ta kai lat pa duna sèn bèk ku a paga di mas na impuesto.

Meskos ku gobièrnu ta eksigí ku ta kumpli ku pago di impuesto pa sierto fecha, meskos mester pone un fecha tambe ku pa mas tardá ta paga restitushon. E dia ei lo no tin petishon mas pa paga “voorschot” riba e restitushon ku tin ku haña serka gobièrnu.