“Bai gaña baka”

WILLEMSTAD.- “Bai gaña baka”. Na Gròt di Hato, Fuik i Brievengat tin yen baka ta kana lòs. Bai gaña nan.” Asina parlamentario Elvin Gerard ta bisa den un reakshon despues di a skucha splikashon di parti promé minister Gilmar ‘Pik’ Pisas na radio i alabes tuma a nota di e komunikado di Global Oil.

Gerard ta bisa ku te ainda e no sa konkretamente ta kuantu sèn ta bai kobra Aqualectra, ni ku ta na florin òf na ta dòler ta kobra. “Mi no a tende tampoko ainda kon a bai ku reunion di Konseho di Minister.”

E parlamentario ta bisa ku otro siman djaluna tin reunion semanal ku ministernan i ku pa mas tardá djaluna pues e lo tende kiko ta e detayenan. “Pero di loke mi a tende i lesa te ainda ta un chanchuyo e kos aki ta.”

E splikashon di Pisas na radio no a konvensí e parlamentario tampoko, segun e mes ta bisa. “Mi a hasi nos promé minister un hòmber mas serio.Bo ta kere un doño ta bende su toko ku un otro hende sin sa ta ki inventario e tin den su toko? No tòg?”

Segun Gerard ta esaki ta loke gobièrnu i Refineria di Kòrsou ke pa pueblo kere. “Ban serio ku e kosnan. Ban serio den e koalishon aki.” E ta mustra mas aleu ku si ta kualke trahadó di un kompania di gobièrnu a tuma un desishon pa traspasá propiedat di pueblo pa un terser kostando komunidat tantu plaka asina, lo a kit’é masha dia for di trabou.

Den e kuadro aki e parlamentario ta puntra su mes ta kiko mas RdK a duna Global Oil den e dil ku a sera. “Dios sa kiko mas a negoshá den e dil ku despues di tempu lo ripará kiko esakinan a kosta pueblo.”

Gerard ta mustra un biaha mas ku e dil entre RdK i Global Oil no ta e mihó dil. “A kita propiedat di pueblo pa laga RdK òf Aqualectra paga e kompania ku a haña e propiedat aki. Esaki ta meskos ku saka sèn for di saku di karson robes i hink’é den saku di karson drechi.”

Pa paga Global Oil e sènnan aki ta mihó yuda e famianan den nesesidat, e parlamentario ta opiná. “Tin kantidat grandi di mama i tata di famia ku no por kumpra tas ku paña di skol pa nan yunan.”

Global Oil ta bisa ku despues ku Regulatory Authority Curaçao (RAC) a evaluá e proposishonnan riba mesa i a base di perspektivanan nobo, e kompania a disidí di baha e tarifa ku e ta kobra Aqualectra ku 30 porshento. No ta splika sinembargo ta di kuantu sèn ta papia di dje a base di e tarifa pa kWh ku Global Oil ta kobra Aqualectra.

Loke si Global Oil a bisa ta ku e método di produkshon di koriente proponé dor di Aqualectra ta enserá ku e gastunan di Global Oil por drei i mantené un turbina di gas ta 18 mion florin. Den e dil ku a sera ku RdK, Global Oil a haña maneho di 2 turbina di gas.

Foto:

...Elvin Gerard...