WILLEMSTAD. - Ilma Mercelita Granviel a nase na aña 1918 na Wacawa. Ilma a desaroyá i a bira un yùfrou di skol. Diferente èks polítiko tabata alumno di Ilma na skol básiko Barber. Antes un hende muhé kasá no por a sigui traha i Ilma a traha su 10 añanan konsekutivo pa por a bini na remarke pa su penshun. Lamentablemente St. Martinus Gesticht a kima ku tur informashon dor di kual hopi yùfrou di skol di e tempu ei no a logra haña nan penshun i mester a biba di e AOV so. Den tempu di nesesidat di dosente a hasi apelashon riba Ilma komo penshonado i Ilma a koperá ku esaki.

Ilma a kasa ku Charles Pablo Maria i e pareha aki a haña 12 yu, 5 hòmber i 7 muhé, entre nan un drieling (triyiso). Ilma a lanta su famia den kaminda di Señor. Ilma ta gusta resa na Mama Maria i sirbi señor. Den esaki Ilma ta un hende hopi humilde kaminda semper el a siña su yunan ku duna ta mas grandi ku risibí i ku hasta for di un tiki por kompartí. Siendo un famia pober si un hende yega di bishita yunan tabatin di warda pa bishita kome promé. Malu malu yunan ta haña funchi ku “corned beef”, funchi ku suku òf kalmèki.

Ilma te ainda ta kere den su Dios i Dios ta su forsa.

Na l982 Ilma a bira viuda i a keda su so ku su yunan te dia di awe. Banda di su 12 yunan Ilma tin diferente yunan di kriansa, di for di promé ku e kasa te ku despues ku e tabatin su mes yunan. Ilma a militá den gruponan sosial i a okupá diferente funshon. Ilma tabata den direktiva di sentro di bario, direktiva di maria legion i tabata organisá dia pa grandinan. Ilma stima tur su famianan.

Su yunan ta Raymundo, Richard, defuntu Franklin, Celsa, Ciro, Lucia, Hyacintha, Francisco, Stella, Mayra, Rita i Patricia. Su yunan nietonan i demas famianan ta hopi orguyoso di nan familiar ku a alkansá e bunita edat aki. Ku Dios bendishon’é rikamente kuida di dje pa e sobrá añanan di su bida

Ilma a mira su famianan di te ku 5 generashon te ainda.

...Riba e kombinashon di foto por haña un impreshon di e selebrashon di 105 aña di bida di sra. Ilma Mercelita Granviel...