Mester duna mas splikashon
WILLEMSTAD.- Loke Refineria di Kòrsou (Rdk) i e kompania Oryx Midstream a firma pa hür di e instalashonnan na Bullenbaai i Emmastad durante 30 aña no ta kuadra ku e espektativanan ku a krea pa futuro di e refineria. Sentral sindikal, SSK ta karesé di informashon riba e dil aki i ta urgi gobièrnu pa duna mas informashon riba kontenido di e akuerdo.
Asina visepresidente di SSK, Wendell Muelen ta bisa den deklarashon pa EXTRA. A kore firma un akuerdo, pero niun hende sa kiko esaki ta enserá. Ta algun informashon vago tin ku ta lanta duda riba futuro di refiná krudo na Kòrsou i p’esei ta importante pa gobièrnu duna mas informashon na tur hende riba e kontrato ku a firma pa 30 aña.
Gobièrnu a duna sentralnan sindikal algun informashon riba personal previo ku a firma e kontrato di hür, “pero ta trata riba traspaso di e 260 trahadónan di CRU (Curaçao Refinery Utilities) pa Oryx Midstream durante di e periodo di transishon”, Muelen ta indiká. E periodo di transishon aki di 3 aña ta e periodo ku Oryx konforme e kontrato ta haña pa tuma un desishon definitivo si e ta komprometé na e kontrato di 30 aña pa hür di e instalashonnan.
Muelen ta bisa ku no a duna informashon mas aleu riba e kreashon di mas kupo di trabou. “Ultimo kòmbersashon ku tabatin ku gremio sindikal riba kreashon di kupo na trabou ta riba e plan pa produsí asfalt ku lo a enserá alrededor di 80 trahadó mas banda di e 260 trahadónan ku ta den servisio di CRU. Den e último informashon ku gobièrnu a duna relashoná ku e negosiashonnan ku Oryx Midstream no a duna detaye riba kantidat di kupo di trabou.”
“Government agreement”
Muelen mas aleu ta suponé ku ta debí ku den komunidat a kue un fadá ku tur lokual ta futuro di refineria, a yega asina leu ku gobièrnu a negoshá un dil ‘kuchi kuchi’ sin ku a duna informashon riba e proseso andando. “Straño ta ku ku no a papia ku stakeholder.”
Komo ehèmpel e visepresidente di SSK a bisa ku Kompania di Tou Kòrsou, KTK ta indiká ku nan no tin informashon riba e kontrato entre RdK i Oryx Midstream. “Si no planifiká i palabrá preis ku KTK, kosnan ta bai pega ora barkunan ku produkto yega.”
Pa kolmo, Muelen ta sigui bisa, KTK a tuma trabou den eksterior pasobra e refineria no tabatin fin pa habri su portanan. “Esaki ta nifiká ku e botonan di tou di KTK ta den eksterior.”
Asina tin mas stakeholder manera servisio di impuesto, Aqualectra, i Curoil ku no a sinta i negoshá ku nan promé ku a firma kontrato di hür, Muelen ta indiká. Esaki ta e asina yamá “government agreement” ku ta yega na dje promé ku firma un kontrato final.
Invershon
Relashoná ku invershonnan nesesario Muelen ta bisa ku pa habri e refineria di nobo mester di invershonnan kuantioso. “E suma di 70 mion dòler ku Oryx Midstream ta bai invertí den 5 aña pa drecha instalashonnan na promé Bullenbaai i despues Emmastad ta zona hopi tiki. Esaki ta zona straño. Si e montantenan ta kuadra, esaki ta nifiká ku refinashon di petroli na Kòrsou a yega na su fin.”
Muelen ta splika ku “headhunting team” di RdK tabata eksigí komo kondishon prueba di fondo di 150 mion dòler i invershon di entre 200 pa 400 mion dòler pa revisá e instalashonnan. “70 mion dòler ta zona hopi abou, p’esei mester splika kon awor si ke habri Bullenbaai ku e suma aki na invershon den 5 aña.”
“Fee”
Loke ku SSK tambe ta haña straño ta e montante di 15 mion ku ta kobra Oryx pa aña komo “fee”. Muelen ta splika ku ta e mesun montante a kobra CPR pa hür di 9 tanki na Bullenbaai, pero awor Oryx ta paga e mesun suma aki pa hür tur instalashon tantu na Bullenbaai komo Emmastad.
Aki tambe e sentral sindikal ta pidi pa duna mas splikashon na komunidat.
Foto:
…Wendell Muelen…
