WILLEMSTAD.- Sentral sindikal SSK ta kere ku si indeksá suèldu mínimo, esaki lo ta bon pa nos ekonomia, pasombra e trahadó tin mas sèn pa gasta, i e sèn ta bin bèk serka doñonan di negoshi. Esaki ta pensamentu di sentral sindikal SSK den reunion djamars último ku gobièrnu, VBC i do otro sentralnan sindikal ku ta Central General di Trahadónan di Kòrsou (CGTC), i Sentral Solidaridat Sindikal (SSS).

Den deklarashon pa EXTRA presidente di Sentral di Sindikatonan di Kòrsou (SSK) sr. Edward Sint Jacobs a indiká ku mester papia riba suèldu mínimo. E aña aki suèldu mínimo no a keda indeksá. Pasobra minister di labor sra. Ruthmilda Larmonie-Cecilia a splika ku el a haña Konseho di SER i Banko Sentral muchu lat,  i mirando situashon di pais, e minister a disidí ku no ta indeksá.

Sr. Sint Jacobs a bisa ku e ta kere ku pa e aña aki e trayekto pa indeksá suèldu mínimo mester kuminsá mas tempran di manera ku minister por haña e konsehonan mas tempran. Tambe e ta kere ku mester bin un manera struktural pa atendé ku suèldu mínimo i tambe e “minimo uurloon”. Aya banda tambe tin e “nul uren” kontrakt ku ta nifiká loke bo  traha ta kobra. E hendenan ta riba standby pa un kantidat di ora. E forma di traha aki  no ta ilegal, pero sr. Sint Jacobs ta kere ku gobièrnu mester atendé ku esaki, pasobra humanamente e no ta bon. Ta pone hende 8 ora riba standby, pero ta 4 ora so ta traha. Por ehèmpel na aeropuerto hendenan ta keda riba standby ta ora avion yega i bai nan ta traha.

Minister Larmonie-Cecilia a bisa ku e tin un plan pa hasi algu struktural riba e tres puntonan menshoná, i ora ta kla lo presentá esaki na sindikatonan. Ta e intenshon pa e plan keda kla e aña aki mes.

Gobièrnu ta papia ku ekonomia no ta bai bon, pero ora indeksá suèldu mínimo dje trahadó, e sèn ta bai drei bek den ekonomia, i tur hende por probechá di esaki, segun Sint Jacobs.

Lei ta preskribí ku pa sèptèmber/òktober minister mester tin un bista di tur konseho pa e por tuma su desishon riba dje. A papia riba asuntu di suèldu mínimo so, e reunion a keda di skors.

Mas aleu sr. Sint Jacobs a bisa ku sindikatonan ke a papia dje situashon general di pais i covid-19. Otro punto ta refineria, pa sa unda ta para. Komo ku no a terminá e reunion, esaki lo kontinuá otro siman djamars, dia 25 di yanüari 2022.